Foto: pixabay.com
‘Julle is die mense wat God uitgekies het wat Hy geheilig het en wat Hy liefhet. Daarom moet julle die volgende soos klere aantrek: liefdevolle deernis, vriendelikheid, nederigheid, sagmoedigheid, geduld. Verdra mekaar en as enigeen ’n klagte teen iemand anders het, vergewe mekaar. Vergewe mekaar soos die Here julle vergewe het. (Kolossense 3:12-13)
’n Nuwe huiseienaar se grassnyertrekker het gebreek en hy het vir twee ure tevergeefs gewerk om dit weer aan die gang te probeer kry. Skielik kom een van sy bure met gereedskap daar aan. “Kan ek jou dalk help?” het hy gevra. Twintig minute later het hy die grassnyer weer mooi aan die werk. “Baie dankie,” sê die nou gelukkige nuweling. “Sê my, wat maak jy met sulke goeie gereedskap?” “Meestal vriende,” het die buurman glimlaggend gesê. “Ek is enige tyd beskikbaar.” ~ Anoniem
Vader, help ons om bewus te wees van wat die mense rondom ons nodig het en dat ons bereid sal wees om van onsself en ons goed te gee om in daardie behoeftes te voorsien. Amen
