Foto: pixabay.com
Skep vir my ’n rein hart, o God, en gee opnuut in die binneste van my ’n vaste gees. (Psalm 51:12, Bybel In Afrikaans 1933/1953)
Dawid vra God vir ’n “vaste” gees. Die woord dui op fermheid, sekerheid of reg wees. Dawid besef, ná sy sonde met Batseba, dat sy innerlike te onseker en onvas is. Hy het hulp nodig. Let op die volgende:
- ’n Impulsiewe en onvaste mens val sommer vir enige versoeking.
Toe Dawid Batseba sien bad, het hy haar dadelik begeer. Hy het haar summier laat haal, sonder om aan die gevolge te dink. Toe haar man ’n probleem word, neem hy weereens ’n baie swak besluit. Daarteenoor loof die Skrif die standvastige man, die een wat staan soos ’n boom by waters, wat ’n reguit pad loop en vir versoekings nee sê. Dis hoe Dawid wil wees.
- ’n “Vaste” gees is ook ’n gees wat seker en rustig is in die wete dat hy God se guns geniet. Ook dit het Dawid nie, want hy voel verlore en ver van God af. Hy wil weer God se vrede hê.
Laat standvastigheid jou kenmerk wees: sterk, gelowig, onwrikbaar, gegrond.
O God, gee my ’n vaste gees. Maak my onbeweeglik sterk. Amen.
Amen!