Gedagte vir die dag: ’n Vriend wat nie vergeet nie

Foto: pixabay.com

Op ’n dag het Dawid gevra: “Het daar nie miskien iemand uit Saul se familie oorgebly nie? Ek sou hom graag onder my sorg wil neem ter wille van Jonatan.” (2 Samuel 9:1)

Dawid is nou koning. Hy is besig. Hy verower Jerusalem en regeer sy koninkryk vanuit die Dawidstad. Hy laat die ark Jerusalem toe bring. Hy voer oorloë en verslaan die een vyand na die ander. Hy kry sy landsadministrasie in orde.

En tog maak hy tyd vir die gewone. Hy bly ingestel op mense. In 2 Samuel 8:15 staan daar: Hy het sy hele volk met reg en billikheid geregeer. Tussen al sy veeleisende pligte as koning dink Dawid aan Jonatan. Sy vriendskap reik verby die dood. Op ’n dag doen hy navraag of daar nie moontlik iemand uit Saul se nageslag is vir wie hy onder sy sorg kan neem nie.

Hy laat Mefiboset, Jonatan se kreupel seun, kom om by hom aan die koninklike hof te kom woon. Hy wil goeddoen aan die nageslag van die man wat hom vervolg het. Dit is die toppunt van vergewensgesindheid en medemenslikheid.

Hoe dikwels vergeet ons nie van iemand sodra ons lewe weer sy gewone gang gaan nie. Ons verskoning is: Ek het gedoen wat ek kon doen. Nou is dit tyd vir my eie belange.

Dawid het meer gedoen as om net vir Mefiboset in sy huis te neem. Hy het al die grond en landerye wat aan Saul behoort het, aan Mefiboset teruggegee. Daarmee het hy sy vervolger geseën en gedemonstreer hoe ware vergifnis lyk.

Here, help my asseblief om ander heelhartig te vergewe. Amen

Bron: Die Here is my Herder deur Lizette Murray
Uitgewer: Christelike Uitgewersmaatskappy/CUM

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

2 Kommentare

jongste oudste gewildste
FM

Sjoe!!!!!
Hierdie gedeelte uit die lewe van Dawid bly besonder.
Nog ‘n voorbeeld van vergifnis is Josef wat sy broers vry spreek.
Vader help my om so te vergewe.
Amen

Yvonne

Here U ken die verraderlike hart van die mense, dankie dat U vergewe meer as wat ek ooit verdien