Foto: Annelize Brits
Toe antwoord Natan vir Dawid: “Jy is daardie man! Die Here, die God van Israel, sê: ‘Ek het jou tot koning van Israel gesalf en jou uit die mag van Saul gered.’” (2 Samuel 12:7)
“Jy is daardie man!” So klink die profeet Natan se woorde aan koning Dawid na sy sonde met Batseba (2 Samuel 11-12). Natan bedoel dit beslis nie as ’n vleiende opmerking, soos wat die Amerikaners maak wanneer hulle sê: “You’re the man!” nie. Hierdie woorde ruk die maskers van Dawid se lewe af. Dit kos egter ’n profeet om die waarheid so te ontbloot. Te veel mense smeer dinge toe. Te veel mense praat net agteraf oor ander wat droogmaak. Nie Natan nie. Nog meer, God kies om te verskil!
God se waarheid is ontblotend. Dit skyn ’n helder lig op die donkerte in ons lewe. Hiervoor gebruik Hy sy moderne Natans. Sulke mense is egter skaars. Dit kos moed om eerlik te wees – nee, nie ongeskik-eerlik nie, net omgee-eerlik. God gee genoeg vir mense om om eerlik met ons elkeen te wees, genade-eerlik, redding-eerlik. Hy wil nie hê dat ons lewens uitmekaarval nie. Hy wil ons naby Hom hê, veilig naby! Laat jy ooit ’n Natan naby aan jouself toe? Is jy ook ’n Natan vir iemand anders?
Here voor U staan ons nakend in ons sonde…dankie dat U BLOED ons skoon was
Wonderlike Heer en Meester Amen