Foto: pixabay.com
Sing vir die Here ’n nuwe lied! Sing vir die Here, almal op aarde! (Psalm 96:1)
Thomas Aquinas, die grootste teoloog van die Middeleeue, het drie dinge verbind met die teenwoordigheid van Christus, naamlik skoonheid, goedheid en waarheid. Ek hou veral van Aquinas se beklemtoning van skoonheid. Dit word dikwels in die kerk misgekyk, of selfs met ’n wêreldse gesindheid in verband gebring. Skoonheid het egter ’n innerlike begin. Die Here maak ons van binne af buitentoe mooi. Dit beteken egter nie ons buitewêreld maak nie ook vir Hom saak nie. Ons mag ons met skoonheid omring – mooi kuns, mooi vakmanskap, mooi skeppings. Dit is alles uitdrukkings van die talente wat God in mense verpak het waarmee hulle die wêreld rondom hulle mooier maak. Ons mag sulke skoonheid ook geniet.
In dieselfde asem moet ons ons eie kreatiewe gawes ontwikkel en gebruik. As ons die talent het om musiek te maak, te skilder, houtwerk te doen of wat ook al, moet ons dit gebruik om skoonheid in die wêreld in te dra tot God se eer. Ons moet die wêreld mooi versier en ander mense help om dit saam met ons te geniet.
alle dank aan die Here vir Sy alom teenwoordigheid