Julle moet niemand iets verskuldig wees nie, behalwe om mekaar lief te hê. Wie sy medemens liefhet, voer die hele wet van God uit. – Romeine 13:8
Ek hou nie van skuld nie. Koop kontant, betaal en stap weg is my motto.
Toegegee, ’n mens kan sommige dinge net bekom as jy bereid is om skuld aan te gaan nie. Daar is nie baie mense wat byvoorbeeld ’n huis of selfs ’n motor kontant kan koop nie.
Die probleem met skuld, krediet is dat dit normaalweg rente loop. Dit is nie lank nie en jy skuld meer as wat die aankoopprys aanvanklik was soos wat rente op die uitstaande bedrag bygevoeg word. Dit is om van te sidder.
Liefde, sê Paulus word in paaiemente betaal. Dit hou aan en aan en aan. Jy kry daarmee nooit klaar nie en ek het ’n vermoede dat dit rente loop. Ons word tog geroep om mekaar meer en meer lief te hê, lief te kry. Ons word geroep om ons liefdes sirkel bewustelik uit te brei. Ons word dit opgedra om die lief te hê wat ander afgeskryf het, om God se liefdesbrief aan ’n verlore gaande wêreld te wees. Jy betaal hierdie skuld nooit volledig af nie. Ek vermoed verder dit is die een ding waarmee ons selfs in die hiernamaals besig gaan wees. Liefde, sê Paulus hou vir altyd.
Daar is geen einde aan liefde nie. Interessant, hoe meer jy gee, hoe meer ontvang jy. Liefde kan nie weerstaan word nie. Dit verower die hardste en hardvogtige hart. Immers, dit het jou hart verower, nie waar nie?
Die Weduwee se Kruik – Lucas Maree
Ons almal is maar bang dat die liefde dalk sal opraak
Dus probeer ons dit tot sterwens toe bewaak
En dan bêre jy dit veilig in die hart se diepste kluis
En hou jou naaste op ʼn afstand met jou vuis
Maar dit is die goeters wat mens weggee wat jou ryk maak
En dit is daarmee wat jy mense om jou raak
Want wat beteken liefde as niemand dit gebruik nie
Of ʼn blom se geur as niemand daaraan ruik nie
Ek vermoed die hart werk soos die weduwee se kruik
Wat vol bly, selfs al sou sy dit gebruik
Ek vermoed die hart werk soos die weduwee se kruik
En die liefde, soos die olie in sy buik
- ToekomsVenster is ʼn daaglikse boodskap om individuele gelowiges toe te rus met praktiese geloofsvaardighede. Kleingroep-begeleidings, DVD’s en funksionele preeksketse is beskikbaar by Drienie ([email protected]) of besoek www.toekomsvenster.co.za
Amen en Amen.
Dit is sulke waar woorde…Amen