Foto: Foundry/Pixabay.com
Ek het weggesak in diep modder waarin ek nie kan staan nie. Ek het in diep waters beland waarin die stroom my meegesleur het. – Psalm 69:3
Ek is baie lief vir fliek, veral daardie lekker avontuurprente waar mense op soek is na ʼn skat en dan met allerlei uitdagings te doen kry.
Vreemde mense skiet op hulle, afgronde diep voor hulle op, goggas en spinnekoppe so groot soos ʼn mens se hand spring op hulle, slange sis in die bome, vreemde monsters swem in die water en dan natuurlik, dryfsand. Onafwendbaar beland iemand in dryfsand en alles word in die stryd gewerp om daardie persoon te red. Soms net-net.
Die ergste is wanneer ʼn hand stadig verswelg word terwyl die sand sy oorwinning vier. Sjoe, my maag is nou op ʼn knop getrek.
Spreekwoordelik ervaar ons ook geleenthede soos hierdie waar die “dryfsand/modder van omstandighede” dreig om ons te verswelg. Ons roep benoud en verdwaas na God en ander om ons te help. Die psalmdigter se getuienis is dat God telkemale gehelp het.
Miskien is dit ook vandag jou ervaring. Hy sal nie toelaat dat jy verswelg word nie. Steek jou hand uit dat Hy jou kan red.
- Bel Drienie by 011 665 2017 of besoek ons by www.toekomsvenster.co.za asook www.toekomsvenster.bybelmedia.org.za vir inligting oor ʼn verskeidenheid stiltetydhandleidings, kleingroep-DVD asook preeksketse vir leraars en gemeentes.
O Heer en wend my arms op na U help my vandag en help die mense van suid afrika wat almal gebuk gaan onder swaarkry en verlies in U Naam alleen deur te bid en te glo maak U dit vir ons nuut!!!! AMEN
Amen!