Waarom wil julle my hart sag maak met julle huilery? Julle weet mos ek is bereid om ter wille van die Naam van die Here Jesus nie net in Jerusalem gevange geneem te word nie, maar selfs ook te sterf. (Handelinge 21:13)
“Resilience” is een van daai Engelse woorde wat nie lekker in Afrikaans vertaal kan word nie. Hierdie term het te make met enige persoon of stelsel se vermoë om onder moeilike omstandighede terug te keer tot hulle oorspronklike vorm. Vasbyters en uithouers, dus.
Die Bybel ken baie sulke mense. Elke geloofsheld van God deur die loop van die Ou Testament en Nuwe Testament het die moed gehad om stroomop te leef. Nêrens het persoonlike veiligheid of welvaart vir ’n Moses gemotiveer toe God hom geroep het om Israel te lei nie. Op sy beurt moes ’n Paulus lewensgevare trotseer ter wille van die evangelie van Christus. Hoe kom het hulle dit gedoen? Wel, die Here se teenwoordigheid in hulle lewe het alle ander dinge getroef. Sy eer, sy nabyheid en sy goedkeuring is al wat saak gemaak het. Dit is vandag nog waar van die Here se eietydse helde. Elke slag as mense regtig in God vasloop, verander die tekstuur van hulle lewe. Dan skuif hulle prioriteite vanaf eie belange na God s’n. En vanaf self-diens na God-diens.