Foto: pixabay.com
Van waar die son opkom tot waar dit ondergaan, moet die Naam van die Here geprys word. (Psalm 113:3)
Is dit wat die psalmskrywer hier voorstel nie ’n bietjie baie gevra nie? Om van sonop tot sononder die Naam van die Here te prys, is nogal intens, of hoe?
Wat hierdie vers vra, is groter, wyer en dieper as om letterlik 24/7 by die kerk te wees of na lofprysingsmusiek te luister. Jou léwe kan ’n offer wees (Romeine 12:1) – hoe jy eet, hoe jy oefen, hoe jy opstaan en hoe jy werk (Deuteronomium 6:7). God word verheerlik as jy in jou doodgewone handel en wandel met die bewustheid leef asof jy voortdurend in sy teenwoordigheid is. Of jy nou in gesprekke met vriende, in jou eie gedagtes, alleen in die badkamer of aan die werk agter jou lessenaar is … dit maak alles saak.
Sal enige van ons hier op aarde dit regkry om altyd in Hom en deur Hom te beweeg en te bestaan (Handelinge 17:28)? Natuurlik nie. Gelukkig is ons ook reeds daarvoor vergewe! Loof die Here vir die splinternuwe genade wat elke oggend saam met die son oor ons lewens opkom.
