Verbly julle in die hoop. Rom 12:12
Jesus sê vir sy dissipels: “In die wêreld sal julle dit moeilik hê; maar hou moed: Ek het die wêreld klaar oorwin” (Joh. 16:33). Christene kan dit dus regkry om in die wêreld met hoop te lewe, al gaan dit sleg met hulle.
Wanneer Paulus hier oor “hoop” praat, praat hy van ’n vaste sekerheid wat elke Christen reeds besit. Hierdie hoop gaan nie met onsekerheid gepaard soos wat ons dit soms gebruik as ons sê “ek hoop my kind gaan matriek slaag” of “ek hoop dit gaan binnekort reën” nie. Die Christelike hoop is altyd vasgeknoop aan God se beloftes wat Hy vir ons in sy Woord gee. En op hierdie beloftes kan ons reken omdat hulle vas en seker is.
Om hierdie rede kan God se kinders hulle in die hoop verbly. Hulle weet dat dié dinge waarop hulle hoop wel waar sal word.
“Die Christen hoop met sy oog op Jesus Christus en die drang om al hoe meer soos Hy te lewe. Sy hoop het nóg meer om die lyf: hy hoop met sy oë op die wolke, die wederkomswolke. Die Christen is bly omdat sy hoop nie by ’n graf doodloop nie, maar die sekerheid van die ewige lewe het,” skryf Johan Smit. (Aangehaal uit Meer as ’n Ja-woord.)
Kry jy dit al reg om altyddeur bly te wees omdat hierdie hoop in jou hart lewe?
Here Jesus, dankie dat ek elke dag met hoop in my hart mag lewe, omdat ek weet dat U elkeen van u beloftes aan my waar sal maak. Amen
Bron:
ʼn Loflied in die môre deur Nina Smit
Uitgewer: Christelike Uitgewersmaatskappy
Kan julle asb julle webblaaie meer druk-vriendelik maak… soos wat dit was voor die veranderinge.
Hoekom het julle dit vir `n mens moeiliker gemaak om by die Gedagte vir die Dag uit te kom? Ek wil vreeslik graag teruggaan na vorige Gedagtes vir die Dag en nou is dit `n hengse storie!!! Dit was makliker toe jy Gedagte van die Dag onder Boeretroos kon vind en met die kliek van die muis die vorige gedagtes kon oopmaak. Maak dit asseblief weer soos ditvoorheen was! Groot asseblief!
Ja, en wat het geword van herman se nuuskommentare?
Dagsê Thys
Jy kan al Herman se Nuuskommentare op die tuisblad (http://maroelamedia.co.za/) opspoor onder “nuus” en dan klik jy op “nuuskommentaar” (http://maroelamedia.co.za/kategorie/nuus/nuuskommentaar/). Ons deel ook die Nuuskommentaar daagliks op ons Facebook-blad (https://www.facebook.com/MaroelaMedia).
Groetnis
Suné
nms Maroela Media
Dankie Sune, ek het dit gekry maar eers na ‘n gesoek. Jy sien, met die veranderings in uitleg word die onderwerpkeuses nie meer voorop uitgegooi soos vroeer nie. Daar staan nou net iets soos kieslys en toe vind ek nou eers uit wat aangaan.
Sou dit nie gehelp het om vir ons dommes te beduie hoe die nuwe uitleg werk nie?
Dagsê Thys
Ons beplan om in Januarie deeglik seker te maak dat al ons lesers vertroud is met die nuwe webwerf en watter inligting hulle waar kan opspoor. Sodra mens eers die uitleg verstaan, dan gaan jy enigiets sommer baie vinnig en maklik kan opspoor. Laat weet gerus indien daar intussen nog berigte of kategorieë is waarna jy op soek is, maar nie kan opspoor nie.
Groetnis
Suné