Aangename woorde is heuning, soet en geneeskragtig vir die mens. ( Spreuke 16:24)
Jakobus het ’n groot deel van sy brief aan die beheersing van die tong bestee. Hy het ons ernstig gewys op die slegte gevolge van woorde wat onnadenkend uitgespreek word (lees Jakobus 3:1–12).
‘Dwaasheid is soos ’n vrou wat luidrugtig bly klets,’ het Salomo gesê, ‘stadig van begrip en sonder kennis van sake’ (Spr 9:13).
Die teenoorgestelde is ook waar. Iemand wat weet wat om te sê en sy tyd om te praat reg kies, is geseënd met wysheid en waardigheid wat mense vertroos en verhef. Salomo, wat meer spreuke versamel en uitgedink het as wat vir ons nagelaat is, het dikwels na wyse woorde verwys: ‘Praat sonder om te dink, kan soos dolksteke wees; wyse mense bring genesing met wat hulle sê’ (Spr 12:18). Daar is ’n tyd vir alles – ‘’n tyd om stil te bly, ’n tyd om te praat,’ het hy ook gesê (Pred 3:7). ‘Bekommernis druk ’n mens neer; ’n vriendelike woord vrolik hom op’ (Spr 12:25).
Kies jou tyd en woorde reg as jy iemand wil troos, prys of bestraf.
‘Wat julle sê,’ skryf Paulus in Kolossense 4:6, ‘moet altyd vriendelik wees en van goeie smaak getuig; en julle moet weet hoe julle elkeen behoort te antwoord.’ Woorde wat op so ’n manier troos en aanmoedig dat die persoon wat dit hoor, daardeur uit sy mismoedigheid gelig word, is goud werd. Dit kan beteken dat ’n talentvolle kunstenaar of navorser nie moed verloor nie, dat hy afbrekende kritiek verwerk en nie sy kwaste of mikroskoop toesluit nie, maar ywerig voortwoeker en later werk van hoogstaande gehalte en kritieke belang vir die samelewing lewer. ‘’n Regverdige mens dink voor hy antwoord; goddelose mense sê net slegte dinge’ (Spr 15:28).
Ten slotte: ‘Goue appels wat in silwer gemonteer is, so is die regte woord op die regte tyd’ (Spr 25:11).
Hemelvader, leer ons om ons woorde so te kies dat hulle vertroos, bemoedig en genees.
Bron:
Liefde vir elke dag deur Helena Hugo
Uitgewer: Struik Christian Media
Boeke deur Helena Hugo is nou beskikbaar by CUM Boeke
Vir meer geestelike artikels besoek Joy! Digital
Amen
Dankie Morula. Ken God in al jou wee
Dis so waar mense moet twee keer dink voor hulle praat
Liewe Here plaas asb n wag voor my mond, sodat ek nie dalk iemand kan seermaak met my woorde nie
2 Julie,
Baie dankie! soveel makliker om te sien en te lees!