Foto: fietzfotos/pixabay
Pak alles gemotiveerd aan. Werk soos vir die Here en nie soos vir mense nie. (Kolossense 3:23)
Hoekom is dit so dat mense so selfingenome is dat hulle nie iemand anders gun om erkenning te ontvang vir ’n taak wat goed afgehandel is nie?
Dikwels strek dit veel verder as om bloot oor die goed voltooide werk te swyg: Die erkenning word subtiel na húlle kant geswaai, of die voltooide werk – of selfs die persoon daarvoor verantwoordelik – word selfs afgekraak. Dit gebeur veral wanneer ’n bestuurder die “glans” na sy of haar kant verskuif. Dit is ook nie vergesog nie dat toekomstige opdragte eerder aan ander toegedeel word wat dit dalk nie so goed sal verrig nie.
Die Here verwag waarskynlik van ’n mens om só op te tree in sulke gevalle:
- Om erkenning te gee vir werk wat goed afgehandel is – sonder professionele jaloesie of verskuilde motiewe.
- Om dit te aanvaar – ’n baie moeilike opdrag – wanneer ander jou “glans” steel nadat jy iets goed afgehandel het. Moenie daaroor tob en ontsteld daaroor wakker lê nie. Volg die eenvoudige raad om dit só goed te verrig dat die Here daarmee tevrede sal wees.
Werk gevolglik soos vir God en nie vir mense nie. En bid dat die ontsteltenis in jou oor die onregverdige behandeling gou sal verbygaan.
