Hy wat ploeg moet met verwagting ploeg, en hy wat dors, moet dit doen met die verwagting om sy deel te ontvang. (1 Korintiërs 9:10)
Elkeen wat namens die Here werk, hetsy vir die kerk of vir enige ander instansie wat geestelike en maatskaplike dienste lewer, behoort self ook versorg te word. Jesus stuur 72 van sy volgelinge vooruit om die koms van God se koninkryk aan te kondig en siekes gesond te maak. ‘Moenie van een huis na die ander trek nie, maar bly in dieselfde huis,’ sê Hy, ‘eet en drink wat hulle voorhande het, want die arbeider is geregtig op sy loon’ (Luk 10:7).
Paulus pleit by die gemeente van Korinte om te voorsien in die lewensonderhoud van hul Christenwerkers. Hy vra nie vir homself nie, maar in die algemeen. Gewone werkers leef van die inkomste wat elkeen met sy werk verdien, hoekom nie ook geestelike arbeiders nie? ‘Wie dien ooit op eie koste as soldaat?’ vra Paulus. ‘Wie plant ’n wingerd en eet nie van sy vrugte nie? Of wie pas vee op en geniet nie van hulle melk nie?’ (1 Kor 9:7).
In Moses se tyd het die Leviete wat die tempeldiens verrig het, hul deel uit die offers ontvang. Ons predikante en leraars wat sewe jaar op universiteit studeer het om ons met insig te lei en te bedien, behoort ’n goeie gemiddelde salaris te kry. Dis by hoë uitsondering dat evangeliste en ander Christenwerkers ryk word uit geld wat hulle deur hul geestelike werk verdien. As dit die geval is, is daar gewoonlik iewers ’n groot skroef los. Gierigheid, woekerwins, diefstal en korrupsie pas nie by God se dienaars nie.
Nie net hulle nie, maar meeste van ons, werk met die hoop om teen die einde van die maand betaal te word, maar ook om resultate op ons arbeid te sien. Mag die Here die werk wat jy vandag afhandel, ryklik seën.
Genadige Vader, dankie dat ons ook op professionele vlak in u koninkryk mag dien en daarvoor betaling mag ontvang.
Bron:
Liefde vir elke dag deur Helena Hugo
Uitgewer: Struik Christian Media
Boeke deur Helena Hugo is nou beskikbaar by CUM Boeke
Vir meer geestelike artikels besoek Joy! Digital