Foto: Rainer_Maiores/Pixabay.com
Deur Ignatius Erasmus
So bevind ek my in die ongemaklike dele van Johannesburg – ek en my ou vroutjie sien die stad maar min, so mens benut dan mos maar die plesiertjies wat die betonreus jou bied.
Kyk ek is ’n dromer, was nog altyd. Ek kan mos nie by ’n rolprentteater verbywandel sonder om te gaan loer wat op die doek aangaan nie.
Elk geval, hier is ek en my vrou op die Sabbat in die stad. Ek sê haar toe, “Kom ons gaan fliek.” So gesê, so gedaan. Ons is ook nie links nie en druk by die eerste beste fênsie mall in.
Die pad was ook effens lank en ek het my blaas toe al twee maal berispe oor hy so knaend kerm. So stap ek toe ook met ’n vinnige tred die gang af, badkamer toe. Die bordjies hou aan wys vorentoe en vorentoe. Dan hot, dan haar. Ek’s al later so dronk gestap, voel aljimmers of ek agter ’n koei aanstap wat haar kalf verloor het. Al verskil, hier is nie ’n lekkerbreekboompie of ’n ou vaalbossie waar ek my blaas kan ledig nie. Die kammaplante in die potte oral op my weg, het amper die doel gedien, maar ’n man is immers nie ’n vark nie, veral nie so met die loerende oë op jou nie.
Helaas, my bestemming lê voor my. Dis seker maar soos die Israeliete van ouds moes voel toe hulle die beloofde land se grense oorgesteek het. Dis toe net hier, waar ek my blaas byna leeg skrik.
Daar in die badkamer sien ek toe ’n lelike ding wat homself uitspeel – dáár waar jy jou hande was, ná jy nou jou sake gedoen het. Daar voor die spieël waar ’n man so skrams vir homself loer – jy weet, net om te kyk of jou neus en goete nog in orde is. Dalk op die uiterste, jou hand so half deur jou baard te vroetel en so terloops jou hare platstryk.
Wel, daar sien ek toe mos drie kannetjies. Ek skat hul ouderdomme tussen 8 en 10 – die oudste een kon dalk 11 jaar oud gewees het. Al drie van hulle staan selfversekerd en min gepla met die res van die manne om hulle. Hulle groom hulself. Die een mannetjie ruk so ewe ’n buisie uit sy bladsakkie, ’n sakkie wat lyk of my suster hom dalk sou dra op ’n Valentine’s Ball. Nou smeer hy die roompie in sy hare in. Die ander mannetjie vryf so half sagkens aan sy wenkbroue, lyk amper soos ’n mamma wat ’n melkwindjie uit ’n baba vrywe. Die derde knapie hou aan vroetel aan sy klinknaelbroekie. Die ding lyk my knyp hom hier in die lies. Lyk kompleet soos ’n bok met hartwater soos hy nou daar stywe been rond trap.
Ek, aan die ander hand, vergeet heeltemal die doel van my sending. Ek trap toe nou maar ook daar rond voor die spiegel. Kyk moet ’n man mos nou maar kyk. Ek merk toe skielik my kakiehemp se kraag is half aan die kreukelkant. My ou leerbelt hou darem die kortbroek op sy plek en my Victorinox-knipmes bult vertroostend hier in my sak. Tevrede met die man wat ek sien, storm ek toe daar uit. Om die waarheid te sê, ek vlug blindelings soos ’n banneling uit daai badkamer. Net een doel voor oë, om my vrou te loop vertel van die drie pierewaaiers in die mansbadkamer. Ek moet haar vertel van die belaglikheid wat ek gade geslaan het.
Later op die pad tref dit my, hier is merakkas, sommer groot ellende. Dit wat ek aanskou het, is die toekoms van ons manne. Oral om my merk ek dit. Die ouer knapies met hul plat kepsies en gietbroeke – daar straal so ʼn kenmerk van slapgattigheid en modebewustheid uit hulle uit. Selfoon pal in die een hand.
Kyk, moet my nie verkeerd verstaan nie, ek is nie oudtyds of verkramp nie. Ek myself is maar ’n jongman van 28 jaar oud. Maar waar het ons as rolmodelle en ouers verkeerd gehandel? Hoe het ons toegelaat dat ons jeug se jeugdigheid en kindwees van hulle berowe is?
My kop begin toe dwaal na my eie jeug. Ek begin toe die lekker dinge van kindwees uitpak. Ek wonder toe of daai drie seuntjies met hul opgetofde hare ooit die lekkerkry sal ken om jou maat se top “te ertjie”. Sal hulle ooit met drie plat klippe giffie kan speel? Sal hulle êrens ’n spruitjie kry waar hulle mekaar met kleilatte kan gooi? Sal hulle ooit die begeerte koester om die skoolhoof se venster met ’n kettie uit te skiet, maar die vrees dat hulle agterente gaan brand, dié begeerte sal doof? Sal hulle ooit weet hoe dit is om kaalvoet oor ’n warm teerpad te snol of om langs die pad te wag en vir die groot trokke te wys om hooter te blaas? Om net op Sondae skoene te dra, om jou naels sommer kort te kou, en jou hande sommer skoonvee aan die binne kant van ’n groen PT-broekie? Sal daai drie mannetjies ooit die magtige klap van ’n windbuks ken? Sal hulle weet van toktokkie speel? Sal hulle orraait wees om agterop ’n bakkie deur die dorp te snor, Coke uit glasbotteltjies drink en dit inruil vir Wilson-toffies?
Sal die mannetjies ooit die skaamte ken van jou eerste meisietjie se aandag te probeer trek? Sal hy weet hoe dit voel om jou kalwerliefde eers met ’n peashooter sag te maak, sodat sy van jou kan notisie neem, sodat julle ’n pouse saam gekys kan wees sonder enige iemand anders se kennis, en dan halfpad deur pouse te breek omdat die brandbal oorkant die vierkant meer aantreklik lyk as die skoon gesiggie hier neffens jou?
Sal hierdie seuns ooit die wêreld sien, sal hulle die begeerte koester om die watertoring uit te klim? Net vir die feit dat jy nie mag nie. Sal hulle ooit met ’n groot toon ’n streep voor sy makker trek, en sê “Trap oor daai lyn, dan boks ons!”
Ek weet nie, dêmmit, ek weet nie. Hoekom was ons so en vandag is niks meer lekker nie? Wie was ons rolmodelle? Ja, ons het Trompie gekyk en Die Swart Kat. Die hoërskoolseuns wat skelm rook en ag, sommer die oom met sy Cruiser wat skeef op ’n randsteen park op ’n sportdag. Wie is die helde vandag? Wil jy werklik vir my vertel dat Justin Bieber so ʼn kolossale rol kan speel dat selfone en sosiale media ons jongspan so beduiwel dat hulle soos opgesmukte skouperdjies in winkelsentrums moet rondhang. Dan, my geliefdes, is ons die skeppers van ’n antisosiale stelsel. ’n Stelsel waar ons klein grootmensies kweek…
Hoe is dit normaal dat 8-jarige meisietjies aan modelkompetisies deelneem? Sodat hulle ryp gedruk en blink grimeer kan word?
Walt Disney het op ’n keer gesê, die groot probleem met die Wêreld is dat almal op die einde grootraak, en ek kan dit beaam.
Hoe kan jy nie ’n kind wil wees nie. Die wêreld het kinders nodig. Kinders droom. Dis waar jy leer om te droom. Jy droom oor ’n wêreld waar daar net speel en lag is. ’n Wêreld waar seerowers eintlik almal goed en gaaf is. Hoe lyk die toekoms as daar nie ’n kinderdroom êrens ontkiem het nie?
Mooiloop en fyntrap, dis woes daar buite.
Jy kan net red wat te redde is!
Goeie skrywe Ignatius.Dit wat jy hier skets is absoluut ‘n realiteit.Ek dink ons politieke verandering die afgelope 25 jaar het ‘n groot rol gespeel in hoe ons jeug vandag gevorm is.Dit wat reeds afgeskaf is, is legio.Dissipline,standaarde,respek,waardes noem maar op is lankal verlore.So tydjie gelede sit ek in ‘n dokter se wagkamer en wag vir my vrou.Daar kom ‘n vrou in met ‘n seuntjie van so ses jaar.Hy kom in met sy aandag op die selfoon besig om speletjies te speel.Hy kyk nie links regs of rond nie,maar net op die foon.Ek glo nie hy het geweet waar hy is nie.Wat my betref kon daar ‘ n bom ontplof het, en hy sou niks agter gekom het nie.Balans in die lewe bestaan eenvoudig nie meer nie.Ek glo wel elke generasie sorg vir homself,hoe goed of sleg dit mag wees.
Dankie Ignatius – ek het jou skrywe terdee geniet en deel beslis jou sentiment – al dan ‘besorgdheid’ oor waarheen ons ‘jong manne’ oppad is – waaragtig weet!
As mamma van een jarige seuntjie hoop, wens en bid ek dat hy ook eendag tok-tokkie kan speel, fietsry in die straat en padda vissies vang in die vlei soos ons gedoen het as kind. Verlang nou skoon na die onskuldige kinderdae!
Lekker nostalgiese leestof…..ja sal seuns nog seuns wees…?
Mooi gesê, bly om jou skrywe nou meer gereeld te sien
Ek droom van ‘n land, nee ek sien dit reeds in vervulling gaan terwyl dit al donkerder word om ons, ‘n land waar die Wet van die God van Waarheid sal uitgaan teen die hele wêreld vry.
Waar manne waarlik man sal wees, hul vrouens en kinders sal koester, hul jongmense die tasbare teenwoordigheid van hul God sal leer. Ons vrouens edel en onkrenkbaar in hul geloof sal wees. ‘n Land waar alle afgodehuise van baäl, hindo, zoar… noem maar op, van hul navolgers verlate sal staan, afgebreekte getuienis tot ‘n era van skande, bandeloosheid en ellende. ‘n Land waar ons Leraars in ware heilige siddering voor die Allerhoogste sal dien. Waar ons Sy Sabbat sal hou en die Sabbat van die wêreld (Sondag) sal verag. ‘n Land waar ons Sy Wet (Exodus 20) waarlik sal verstaan en leef. ‘n Volk wat tot getuie teen die wêreld sal opstaan en hul toon dat ons God steeds red, dat geen fisiese of geestelike mag voor Hom sal standhou nie. Die Eer sal Syne wees, geen sterfling sal daarop aanspraak maak nie.
Maar voor dan, Boervolk, sal ons deur diepe waters gaan, deur ‘n ongekende verskrikking en benoudheid gelouter, meer valse regeerders en sodra hulle hul oorwinning vier, sal hulle ook val.
Ek sien hoe my volk wakker word, stadig, een vir een en niemand kan dit keer nie.
…in watter boek lees jy dit waaruit jou droom gevorm het ?
Knap geskryf, hoor. Jy kan raakvat skryf.
Ignatius, jy het dit so mooi raak geskryf. Dit is tyd dat jy weer kom kuier. Ons mis dit dat julle sommer so kaalvoet met die perde kom kuier en nie bekommerd is daaroor om in die donker weer te moet terug ry nie. Mooi loop.
Dit was die goeie ou dae. Toe het ‘n grasbesem gedien as perd en met ‘n bloudraad deur ‘n ou oliefilter het jy gejaag dat die klippe spat en en…….
Ek wens daar was ‘n boek vol sulke stories!
oop oge
Kom ons antwoorde nie hoofsaaklik uit die Groot boek nie? Is dit nie hy wat hom besig hou met die Woorde van God wat wys word nie? God se Woorde is vir ons opgeteken in die Bybel deur Moses, die Profete, in die 4 Evangelies en Openbaring.
Begin deur die Johannes evangelie van hoofstuk 1 tot 21 in een naweek deur te werk, party mense kan dit in een dag doen. As jy klaar is sal jy dink dat jy dit als reeds weet. Herhaal die oefening nog 2 /3 naweke en let op die aangehaalde Woorde van Jesus en jy sal vind dat ons nie leef soos Hy beveel nie, jy sal kamtige teenstrydighede vind maar Hy maak nie foute nie, ook het Hy geen deel aan die leuen nie, vat dan jou vraagstukke na Hom en Hy sal jou leer. Bykans al die vraagstukke wat jy mag hê sal Hy vir jou vanuit die Bybel duidelik maak. En as Hy op jou ag gee en jou leer en jy Hom steeds soek sal Hy jou oë open om te kan sien, om die huidige te verstaan en die toekoms te sien deur dit wat Hy self in beide die ou en nuwe testamente geprofeteer het.