Resep: Ouma se aartappelkoekies

Maroela Media-leser Charlene van der Linde vertel dat haar ouma altyd hierdie aartappelkoekies vir hulle gemaak het.

Van der Linde het nooit moeite gedoen om die bestanddele en metode te onthou of neer te skryf nie, en daarom was dit wonderlik toe hulle ʼn jaar ná haar ouma se dood op die resep afkom wat in haar ouma se eie handskrif geskryf is.

“As ek reg onthou het my ouma dit nog by haar ouma gekry,” sê Van der Linde. “Dit is so vinnig en maklik om my ouma se aartappelkoekies te maak en dit smaak boonop heerlik.”

Bestanddele

• 3 mediumgrootte aartappels
• 1 e koekmeelblom
• 1 eier, geklits
• 1 t sout
• 2 t bakpoeier
• bietjie olie om die koekies in te braai

Metode

1. Skil en rasper die aartappels.
2. Meng die ander bestanddele by.
3. Verhit ʼn klein bietjie olie in die pan (net genoeg om te kan braai).
4. Braai lepels vol van die mengsel totdat albei kante van die koekies bruin is.

Het jy ʼn resep wat jy met ons kan deel? Stuur dit hier na Maroela Media.