Soorte resepte:

Foto’s: Besoek dié paradys vir koffie-aficionado’s

(Foto: Elsabé Schoeman)

Deur Esté Meyer Jansen

In Hennopspark, Centurion, is daar ʼn koffiewinkel waar jy alles vir ʼn goeie koppie boeretroos kan vind, van perfek geroosterde bone tot toerusting om die beste koppie te brou.

Met die intrapslag weet jy sommer hiér word daar behoorlik met koffie gewerk. Dit is die geur van vars geroosterde koffiebone gemeng met die vriendelike groete van die personeel wat jou sommer dadelik laat tuis voel, terwyl ons ons weg vind na ʼn toonbank in die koffiekroeg, waar die eienaar, Francois Dreyer, vir ons ʼn ware koffieproe-ervaring uitgepak het.

Dit is die dag wat ons gaan reis van Ethiopië tot in die eksotiesste plekke in Suid-Amerika, en dít alles in ʼn beker.

Francois, wat saam met sy vrou, Elsabe, in 2012 in hul eetkamer koffie begin rooster het, is passievol oor die maak van die perfekte koppie koffie. Die meester verduidelik ons vinnig hoe spesialiteitskoffie gegradeer word, en ons vind uit van die legendariese Jamaikaanse Blue Mountain-koffie wat R1 000 per kilogram behaal en waarvan 80% na Japan uitgevoer word.

Volgende aan die beurt is die prosesse van hoe spesialiteitskoffie gemaak word – van gewas, tot gedroog of natuurlike en ook semi-natuurlike prosesse. Elke manier verander die geur van die bone wat op die ou einde in jou beker beland.

Koffiebone is die put of saad van kersies wat groei op plante so groot soos ʼn groot struik. Hierdie koffiekersies word geoes, en die bone word van die kersie se vrugtevesel geskei voordat dit gerooster word.

Oorspronklik sou die koffie sommer net in die son gedroog word totdat dit gereed is om te maal, en hierdie natuurlike metode word nog dikwels in Brasilië en Ethiopië gebruik. Deesdae word baie koffiebone gewas om die vrug te verwyder voordat dit gedroog word. Hierdie proses is dikwels vinniger en tans die metode wat meer algemeen gebruik word. Daar is dan ook ʼn kruising tussen natuurlik en gewas, wat die “verpulpte natuurlike proses” of “heuningproses” genoem word.

Sommige koffies word tydens die fermentasieproses aan minder lug blootgestel, en hierdie anaerobiese fermentasies kan gebruik word met heel koffiekersies of verpulpte boontjies.

Dit word alles natuurlik gedoen om die beste geure en smake uit die koffiebone te verkry.

Ons proe koffie vanuit Rwanda, Nicaragua, Ethiopië, Colombië en Brasilië. Die koffie se smake en geure word getoets soos wafferse wynmeesters in die kelders, en woorde soos “vrugtig”, “volronde”, “suur” en “bessies” word gebruik om te beskryf wat ons proe.

Dit is vinnig duidelik dat daar ʼn koffie vir elke smaak van elke persoon is wat om die toonbank sit en proe.

Heavenly Coffees bied gereeld koffie-ervarings wat verskeie broumetodes, die maak van die perfekte espresso, proe en selfs barista-opleiding insluit.

Brou die perfekte koppie sawwelyf met jou dompelpot

Werk jy op ʼn streng begroting, maar wil steeds die perfekte koppie boeretroos tuis brou? Francois het die perfekte raad:

Skaf jou gunsteling- geroosterde koffie aan saam met ʼn dompelkoffiepot (plunger) wat van dubbele glas of vlekvrye staal gemaak is. Só verseker jy jou koffie bly langer warm, en jou pot sal nie so maklik breek of jou vingers verbrand nie – iets waaroor almal om die tafel gekla het.

Verhit die water tot net voor kookpunt, en spoel jou hele koffiepot met hierdie water uit. Sodoende verseker jy sommer jou koffie bly langer warm.

Gebruik ʼn skaal om jou grof gemaalde koffiebone af te meet. Francois beveel ongeveer 15 gram koffie en 225 gram water vir ʼn koppie koffie aan. Kalibreer jou elektroniese kombuisskaal om jou te help om die regte afmetings in die pot vir die vloeistof te kry.

Gebruik dieselfde verhouding van koffie tot water vir elke koffie wat jy wil maak. Pas gerus die verhouding van koffie tot water aan as jy van ʼn sterker of flouer koppie boeretroos hou, maar moenie die koffie te lank laat staan nie omdat dit ʼn bitter smaak kan ontwikkel.

Gooi die warm water – nie kookwater nie – egalig en stadig oor die koffie in die pot. Die koffie sal ʼn lagie vorm soos wat aromatiese olies en geure van die koffie vrygestel word. Meng stadig en goed met ʼn hout- of plastieklepel sodat soveel moontlik van die koffie se olies en geure aan die warm water blootgestel word.

Laat die koffie trek vir 4 minute waarna jy die sif na onder kan dompel om jou koffie te filtreer. Geniet dadelik al die koffie!

Wenk: Verhit melk as jy van ʼn warmer koppie koffie hou, hoewel Francois glo ʼn goeie koppie koffie het geen melk of suiker nodig nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.