Maroela Media-leser Gerrit Steyn het vir ons hierdie maklike happie met slegs vyf bestanddele gestuur!
Lewer ongeveer 62 klein koekies.
Bestanddele
- 225 g gerasperde Cheddarkaas
- 4 e sagte botter
- 1 t sout
- 125 g koekmeel
- 2 e yswater
Metode
- Voorverhit die oond tot 180 °C.
- Gebruik ʼn elektriese menger en klits die gerasperde kaas, botter en sout tot bestanddele goed gebind het. Meng die koekmeel by.
- Voeg die yswater by, een eetlepel op ’n slag. Die deeg behoort gebind te wees, maar tog te verkrummel as jy dit in jou hand sou breek. As dit te droog is, voeg nog yswater by.
- Verdeel die deeg in twee dele en druk elke deel plat, die grootte van ’n piering.
- Draai dit dan afsonderlik toe in waspapier en plaas dit vir 30 minute in yskas.
- Rol die deeg uit tot ½ cm dik.
- Gebruik ’n klein glasie om die koekies uit te druk.
- Pak die koekies op ’n gesmeerde bakplaat so ongeveer 1 cm uitmekaar.
- Druk nou met die agterkant van ’n sosatiestokkie ’n gaatjie in die middel van die koekie. Beweeg dit so effe in die rondte om die gaatjie groter te maak. (Die gaatjie is vir ventilasie terwyl dit bak).
- Bak vir 13 minute tot goudbruin. Indien nodig (as die agterkant nog te lig is) draai dan om en bak ’n verdere 4 minute.
- Laat dit eers afkoel voor opdiening.
Dit lyk vreeslik lekker. Baie dankie!
Klink en lyk heerlik. En maklik. En nie duur nie.
Lyk baie lekker. Maar dit is nie beskuitjies nie, dit is koekies!