Plaatkoekies is in baie huishoudings ʼn tradisionele gereg.
Lewer 12 plaatkoekies
Bestanddele
- 500 ml/250 g Sasko-semelryke bruismeel
- 5 ml bakpoeier
- 30 ml suiker
- 2,5 ml sout
- 250-275 ml melk
- 2 groot eiers
- 10 ml sonneblom- of kanola-olie
- olie vir braai
Metode
- Meng die bruismeel, bakpoeier, suiker en sout en maak ʼn holte daarin.
- Klits die melk, eiers en olie saam en giet dit in die holte van die droë bestanddele. Begin van die middel af om die vloeistof en droë bestanddele te meng tot ʼn gladde beslag vorm.
- Verhit ʼn braaipan tot matig warm. Verf die bodem van die pan met ʼn bietjie olie. Skep 50 tot 75 ml beslag entjies uitmekaar in die braaipan. Laat ruimte vir die beslag om te versprei en te rys.
- Bak die plaatkoekies totdat borrels op die oppervlak vorm en begin breek. Draai dit met ʼn eierspaan om en bak die ander kante.
Wenke:
- Die plaatkoekies kan vir 24 uur in die koelkas gebêre of tot 3 maande in ʼn lugdigte houer bevries word. Verpak die plaatkoekies voor bevriesing tussen lae bakpapier in hoeveelhede wat jy per keer wil gebruik.
- Die plaatkoekies sal maklik voor teetyd of pouse in die kosblik ontdooi.
- Die resep kan maklik halveer word.
Bron: Uitpakkos deur Hilda Lategan
Uitgewer: Lapa
Ai, ek is so lank al lus vir plaat koekies, maar my ma wil nie die skimp vang nie
vrouens vang nie skimpe nie – jy sal maar moet reguit vra – wat is in elk geval verkeerd met jou hande – hoekom bak jy nie self nie?
Onthou om die plaatkoekies goed te dreineer as jy olie gebruik. Spray-and-Cook is beter veral as jy geneig is tot galaanvalle of slegte spysvertering of aan IBS of IBD lei.