Resep: Rooi fluweelkoek

Rooi fluweelkoek (Foto: Lapa Uitgewers)

Jou volgende koek-en-tee-sessie sal alte jolig gaan wanneer jy dié rooi fluweelkoek bedien.

Bestanddele

Koek

• 2½ k koekmeel
• 1½ k suiker
• 1 t bakpoeier
• 1 t sout
• 1 t kakao
• 1½ k olie
• 1 k karringmelk
• 2 groot eiers (kamertemperatuur)
• 2 e rooi voedselkleursel
• 1 t witwynasyn
• 1 t vanieljegeursel

Versiersel

• 500 g botter
• 1,3 kg roomkaas
• 15 ml vanieljegeursel
• 750 g versiersuiker

Metode

1. Voorverhit die oond tot 180 °C en smeer twee groot koekpanne.
2. Strooi koekmeel in die koekpanne nadat dit gesmeer is.
3. Sif die meel, suiker, bakpoeier, sout en kakao saam.
4. Klits die olie, karringmelk, eiers, kleursel, asyn en vanieljegeursel saam.
5. Gebruik ʼn menger en meng die droë bestanddele by die nat bestanddele tot net gemeng en jy ʼn lekker beslag het.
6. Verdeel die beslag tussen die voorbereide koekpanne en bak tot die koek effens van die pan begin wegtrek en ʼn toetspen skoon uitkom, ongeveer 30 minute.
7. Onthou om die koeke halfpad deur die baktyd te draai. Verwyder die koek uit die oond en druk ʼn mes langs die rande in om die koek effens los te maak.
8. Keer die koeke uit en laat heeltemal afkoel.

Versiersel

1. Verroom die botter met ʼn handmenger en voeg daarna die roomkaas by.
2. Verroom die twee saam en voeg die vanieljegeursel by.
3. Meng die versiersuiker stelselmatig by tot die versiersel soet genoeg is vir jou.
4. Smeer die versiersel lekker dik tussen die koeklae en plaas op mekaar.
5. Versier die res van die koek met die versiersel en rond af soos jy verkies – die silwer balletjies lyk vir my oulik.

Bron: Sjef Snoekie laat die potte sing
Uitgewer: Lapa