In dié week se episode van Martelize se stamtafel kuier die teaterveteraan Antoinette Kellerman saam met Martelize Brink. Hulle gesels oor Antoinette se Duitse herkoms en Martelize sit eintopf, ʼn tradisionele Duitse eenpotgereg uit die 1800’s, voor.
Maak Martelize se eintopf só:
Bestanddele
- 500 g lamsvleis, in blokkies gesny (boud of skenkel)
- 500 g stowebeesvleis, in blokkies gesny
- 500 g varkvleis, in blokkies gesny (skouer of lies [belly])
- olyfolie vir braai
- 1 groot ui
- 4 wortels
- 200 g boerenkool (kale)
- 4 preie, in ringe opgesny (onthou om dit goed te spoel of laat lê opgesnyde preie in water vir 15 minute)
- 4 aartappels, in blokkies opgesny
- ʼn liter hoenderaftreksel
- sout en peper na smaak
Metode
- Braai die vleis in sarsies tot bruin en verwyder uit die pot.
- Braai uie tot bruin.
- Sit die vleis terug in die pot.
- Voeg die groente en die aftreksel by die pot en geur na smaak.
- Prut vir 1½-2 uur tot die vleis sag is.
Het jy geweet? “Kellermann” kom van middelhoogduits vir kelderman. Nadat dit hier aangekom het en vernederlands is, het die dubbel-“n” in baie gevalle weggeval. Die hoofstamvader, Georg Peter Kellermann, het in die laat 1700’s van Düsseldorf af as geneesheer Kaap toe gekom.
Martelize se stamtafel is Woensdag om 17:00 op VIA, DStv-kanaal 147, te sien.
Maw potjiekos met die fout om kool in te sit
Potjiekos is lekker as daar kool in is
Haha, dit was amper presies my gedagte ook: dit is basies potjiekos. Maar ek hou nogal van kool in die mengsel. :-)