Resep: Stamp-poeding met fyngemaakte stampmielies

Stamp-poeding met fyngemaakte stampmielies (Foto: Gerrit Steyn)

Maroela Media-leser Gerrit Steyn sê hy maak gereeld disse wat van heel stampmielies gemaak is, maar hierdie een is besonders omdat die stampmielies met ʼn stokmenger fyngemaak word.

“Die resep is ideaal wanneer daar stampmielies vanaf ʼn vorige ete oorgebly het en jy iets lekkers hiermee wil maak. Dit is heerlik en ʼn móét om te maak,” sê hy.

Bestanddele

  • 4 k fyngemaakte stampmielies
  • 1 k melk
  • 3 eiers
  • ½ t sout
  • 2 e vla, aangemaak met ʼn bietjie melk
  • ¼ t koeksoda, aangemaak met ʼn bietjie melk
  • 1 t kaneel
  • 1 t neutmuskaat
  • 1 k suiker
  • 2 e botter, gesmelt
  • 2 e appelkooskonfyt, hoogvol

Metode

  1. Voorverhit die oond by 180 °C.
  2. Roer die koppie melk by die fyngemaakte stampmielies sodat die mengsel makliker fyngemaak kan word.
  3. Meng nou die res van die bestanddele, behalwe die appelkooskonfyt, by die stampmielie-mengsel. Die tekstuur hiervan is amper soos dié van ʼn dik sop.
  4. Smeer ʼn tertbak met botter en giet die mengsel daarin uit.
  5. Bak vir ongeveer 45 minute of tot die bokant van die tert ligbruin is.
  6. Smeer appelkooskonfyt op die bokant van die tert.

Wenke

  • As daar ʼn ekstra een tot twee piesangs beskikbaar is, kan dit verpulp en by die mengsel ingeroer word.
  • Die tert kan met room of vla opgedien word.

Stuur vir ons jou familie resep hier!

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

1 Kommentaar

jongste oudste gewildste
Rika

Waarom was my skrywe nie aanvaar nie?