Soorte resepte:

Proe Frankryk in jou eie huis

Seebaars met lensie-kerrie en gepekelde komkommer (Foto: Verskaf)

Ons kan nie nou na Frankryk toe vlieg vir sy hemelse brode, verleidelike fyngebak en ongelooflike wyne nie, maar daar is geen rede hoekom ons nie Frankryk in ons huise kan verwelkom nie.

Wouter Vermeulen, algemene bestuurder vir Air France in Suidelike Afrika, sê hy is bly om te sien dat mense gedurende isolasie en geslote grense steeds bereid is om virtueel van ander lande te leer.

“Een manier waarop ons sien dat mense die res van die wêreld nader aan hul huise bring, is deur kos. Om al die sosialemediaplasing te sien van mense wat brood bak, is genoeg om jou heeldag te laat droom oor ʼn stomende vars gebakte baguette in die strate van Parys,” sê hy.

Hier is ʼn paar Franse resepte terwyl jy wag om jou vliegtuigkaartjies na die land van romanse en heerlike kos te bespreek:

Romerige garnaalsop

Garnale word algemeen in Franse disse gebruik en hierdie heerlike resep van Chilli Chocolate Chefs is vol gelaai met Franse geure. Dit is ook so maklik om te maak dat jou huis sommer vinnig soos ʼn Franse fynproewer-restaurant sal voel.

Lewer 8 porsies

Bestanddele

  • 2 e botter
  • 1 e gemaalde knoffel
  • 1 e gemengde kruie
  • 1 wortel, gerasper
  • 1 ui, fyngekap
  • 250 g garnale, skoongemaak
  • 30 ml tamatiepasta
  • 500 ml water
  • 500 ml room
  • Sout
  • gemaalde swartpeper na smaak 

OPDIENING

  • 2 e botter
  • 2 t suurlemoenpeper
  • 2 t gemaalde knoffel
  • pietersielie

Metode

  1. Verhit die botter in ʼn pot.
  2. Voeg die wortel en ui by en braai vir 2 minute.
  3. Voeg knoffel en gemengde kruie by en braai vir nog ʼn paar minute.
  4. Voeg ¾ van die garnale, die tamatiepasta en water by en laat prut vir 15 minute.
  5. Meng alles met voedselverwerker tot dik en romerig.
  6. Giet terug in pot en voeg room by.
  7. Geur met sout en peper.

OPDIENING

  1. Braai oorblywende garnale in botter, knoffel, suurlemoenpeper en pietersielie in ʼn braaipan saam.
  2. Skep die sop in bakkies en skep van die ekstra garnale bo-oor.
  3. Skep bietjie room oor en bedien.

Seebaars met lensie-kerrie en gepekelde komkommer

Hierdie resep van sjef David Higgs stel sy groot Franse inspirasie in sy disse en tegnieke ten toon. Higgs self het al erken hy is mal daaroor om Franse kos te maak en dat vis hom die geleentheid bied om uitsonderlike geure na vore te bring.

Lewer 8 porsies

Bestanddele

SEEBAARS

  • 640 g seebaarsfilette met die vel aan (80 g per porsie)
  • Sout en peper
  • Suurlemoenskil

LENSIE-KERRIE

  • 1 ui, fyngekap
  • 1 wortel, fyn gerasper
  • 1 huisie knoffel, gerasper
  • 5 g komyn
  • 3 g mosterdsaadjies
  • 2 tamaties, vel verwyder en fyngekap
  • 8 g nat seekos-masala
  • 5 g bruinsuiker
  • 350 g bruin lensies, gespoel
  • 200 ml tamatiesap
  • 250 ml groenteaftreksel
  • sout en peper na smaak
  • suurlemoensap

GEPEKELDE KOMKOMMER

  • 200 ml rysasyn
  • 2 komkommers, saadjies verwyder en geskil
  • 32 takkie mikrokoljander (4 per porsie)
  • 72 klein vinkeltakkies (9 per porsie)

Metode

  1. Braai die vis met sy vel na onder en draai om wanneer die vleis se kleur na wit begin verander. Geur met sout, peper en suurlemoenskil.
  2. Braai die uie, wortel en knoffel tot deurskynend en voeg speserye by. Braai vir nog ʼn paar minute.
  3. Voeg tamaties, masala, bruinsuiker, lensies, tamatiesap en groenteaftreksel by en bedek met deksel. Laat prut stadig vir 1 uur tot die kerriesous effens verdik. Maak seker die lensies word nie oorgaar nie.
  4. Laat afkoel en verkoel dan vir een dag in die yskas voor opdiening. Kerrie se geur ontwikkel as dit vir ʼn tyd lank staan. Verhit die kerrie geleidelik in ʼn pot voor opdiening.

GEPEKELDE KOMKOMMER

  1. Giet die koue pekelvloeistof in ʼn vakuumsak. Voeg die komkommer by en vakuum toe. Stoor in yskas vir 24-36 uur. Verwyder komkommer uit sak. Sny in linte.
  2. Skep 45 g warm lensie-kerrie in elke bord. Sit ʼn stuk vis bo-op elke kerrieporsie neer. Versier met twee komkommerlinte, mikrokoljander en vinkel.

Biefstuk met mosterdbotter en ciabatta-brood

Brood speel ʼn belangrike rol in Franse kookkuns en Chilli Chocolate Chefs het dit reggekry om brood en vleis mekaar te laat komplementeer op die mees Franse manier moontlik.

Lewer 8 porsies

Bestanddele

  • 8 stukke beesfilette, in dun repies gesny (2 cm dik)
  • ½ t swartpeper
  • ½ t sout
  • ½ t brandrissiepoeier
  • 1 t vars koljander, gekap
  • olyfolie
  • 1 ciabatta-brood

MOSTERDBOTTER

  • 1 e botter
  • 1 t volgraan mosterd

Metode

  1. Druk die biefstuk effens droog en vryf dit dan goed in met sout, peper, brandrissiepoeier en koljander.
  2. Skud in olyfolie sodat dit bedek is.
  3. Rooster die ciabatta effens.
  4. Maak die biefstuk gaar in ʼn pan oor hoë hitte.
  5. Plaas die biefstuk op die ciabatta-brood en smeer met mosterdbotter en bedien met vars kruie.

MOSTERDBOTTER

  1. Meng die botter en mosterd goed saam.

Bron: That Food Guy via Air France

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae