Resep: Biefribbetjies in rooiwyn

Biefribbetjies in rooiwyn (Foto: Lapa Uitgewers)

Trek daardie prutpot van jou nader en berei heerlike biefribbetjies vir jou en jou gesin.

Lewer 8 porsies.

Prut vir 8 tot 9 uur.

Bestanddele

• 10 ml sout
• 10 ml varsgemaalde swartpeper
• 80 ml koekmeel
• 45 ml kanola-olie
• 2,3 kg beeskortribbetjies
• 2 uie, gekap
• 250 g sampioene, in kwarte gesny
• 30 ml fyngekapte vars knoffel
• 30 ml tamatiepasta
• 1 vars tiemietakkie of 5 ml gedroogde tiemie
• 1 lourierblaar
• 500 ml rooiwyn
• 250 ml biefaftreksel
• 250 ml water

Metode

1. Meng die sout, peper en meel in ’n plastieksakkie. Plaas die ribbetjies in die sakkie en skud sodat die vleis met meel bedek is.
2. Verhit die olie in ’n swaarboompan en braai die ribbetjies in sarsies tot bruin. Skep die ribbetjies uit in die prutpot se bak.
3. Verlaag die hitte en soteer die uie en sampioene liggies vir ongeveer 10 minute tot goudbruin.
4. Voeg die knoffel by en soteer vir nog ʼn minuut. Roer die tamatiepasta, tiemie en lourierblaar deur die uiemengsel en soteer vir nog 5 minute. Skep die uiemengsel ook in die prutpot se bak.
5. Giet die wyn, aftreksel en water in die pan en verhit tot kookpunt. Verlaag die hitte en laat die vloeistof vir ongeveer 10 minute afkook. Giet die vloeistof oor die groente en ribbetjies.
6. Plaas die prutpot se deksel op en kook vir 8-9 uur op Laag of 5 uur op Hoog. Die vleis sal sag wees en amper van die bene afval. Bedien saam met kapokaartappels of rys.

Bron: 50 Prutpotgeregte
Uitgewer: Lapa