Boeliebief-tert (Foto: Lapa Uitgewers)
Wanneer die finansies knyp sal hierdie souttertresep met boeliebief handig te pas kom.
Lewer sowat 6 porsies
Bestanddele
- bietjie olie
- 1 ui, gekap
- 2,5 ml vars gekapte knoffel
- 2 selderystingels, fyngekap
- 30 ml vars gekapte pietersielie
- 4 ekstragroot eiers
- 375 ml vars witbroodkrummels
- 375 ml melk
- 250 ml gerasperde Cheddarkaas
- 300 g (1 blik) boeliebief, in blokkies gesny
Metode
- Voorverhit die oond tot 180 °C.
- Verhit die olie en soteer die ui en knoffel daarin tot sag.
- Voeg die seldery en pietersielie by en soteer vir nog 3 minute. Verwyder van hitte.
- Klits die eiers goed en voeg by die uimengsel.
- Voeg die oorblywende bestanddele by en roer tot gemeng.
- Skep die mengsel in ʼn oondbak van ongeveer 24 cm x 18 cm groot wat met kossproei gespuit is.
- Bak vir 45 minute of tot gestol in die middel.
Bron: Lekker & Gesond: Veselryk deur Hilda Lategan
Uitgewer: Lapa
Laat my terug dink, en so sal baie ander MM lede/lesers ook, ons kon wondere doen met n blikkie boeliebief.
Het julle miskien gekyk wat ‘n blik boeliebeef deesdae kos? Sal miskien goedkoper wegkom met 300g fillet.