Wat ʼn heerlike Kaapse resep van Koelsoem Kamalie en Flori Schrikker! Dié twee het verlede maand by Maroela Media kom kuier oor hul kookboek Kook saam Kaaps.
Lewer 6-8 porsies
Bestanddele:
- 5 ml kookolie
- 15 ml botter
- 1 groot ui, fyngekap
- 5 ml fyngekapte knoffel
- 7,5 ml fyn gemmer
- 10 ml bruinsuiker
- 7,5 ml matige kerriepoeier
- 5 ml borrie
- sout en varsgemaalde swartpeper na smaak
- 500 g beesmaalvleis
- 25 ml blatjang
- 10 ml appelkooskonfyt
- 10 ml asyn
- 10 ml worcestersous
- 10 ml tamatiepasta
- 500 g klaargemaakte brooddeeg
- 1 eier, geklits
Metode:
- Verhit die olie en botter in ʼn swaarboomkastrol en braai die uie liggies tot sag en deurskynend.
- Voeg die gekapte knoffel by en braai vir nog 2 minute.
- Voeg die gemmer, suiker, kerrie, borrie, sout en peper by die uie en braai liggies vir ʼn verdere 2 minute.
- Voeg die maalvleis, blatjang, appelkooskonfyt, asyn, worcestersous en tamatiepasta by en roer deur.
- Laat die mengsel vir 30-45 minute oor matige hitte prut.
- Voorverhit die oond tot 180 ˚C en spuit ʼn bakplaat met kossproei.
- Rol die deeg op ʼn meelbestrooide oppervlak tot 1 cm dik uit
- Skep die kerriemaalvleis op die deeg en versprei dit eweredig.
- Rol die deeg op soos ʼn rolkoek en sny die rol in 1 cm-skywe.
- Pak die skywe plat op die voorbereide bakplaat en verf die geklitste eier bo-oor.
- Bak vir 15-20 minute tot goudbruin en gaar.
Bron: Kook saam Kaaps
Uitgewer: Lapa
Twee lieflike mense…..spontaan lieflik. As ek net so kon kook, sou my lewensmaat seker vir my koperpotte gekoop het! : )
foxi, as ek die lotto wen, koop ek vir jou 2 stelle!
Wie nou-Roly en Poly?
Klink reg vir n naweek dis dankie!
Ek love die twee dames. So spontaan. Het gister hulle boek gekoop en kan nie wag om dit te gebruik nie. Sou baie graag hulle handtekeninge en n ou boodskappie in my boek wou he
Dit lyk op foto of daar nog gerasperde kaas ook oor party rolletjies gestrooi is? Seker dan opsioneel want ek lees niks van dit in die resep nie.