Resep: Portugese familiehoender

Portugese familiehoender (Foto: Lapa Uitgewers)

“My oorle’ grootoom Jacobus Ferreira was ʼn absolute kenner van die Ferreira-familiestamboom en -geskiedenis en het selfs ʼn boek daaroor geskryf. Hierdie resep is een van sy gunstelinge wat ek aangepas het,” skryf Armand Aucamp in sy resepteboek, Armand kook kaal 2.

Lewer 4 porsies

Bestanddele

• 4 e olyfolie
• 1½ kg hoenderstukke
• 3 uie, in kwarte gesny
• 6 knoffelhuisies, gekap
• 1 e paprika
• 1 t varsgemaalde swartpeper
• 1 e orego
• 500 ml hoenderaftreksel
• 250 ml droë rooiwyn
• 1 e xilitol
• 10 druppels Tabasco
• 2 e tamatiepasta
• 1 blikkie (400 g) heel tamaties
• sap van ½ suurlemoen
• 2 e amandelmeel
• 2 lourierblare
• sout
• suurroom
• gekapte pietersielie

Metode

1. Voorverhit die oond tot 180 °C.
2. Verhit die olyfolie in ʼn groot, oondvaste pot en braai die hoenderstukke oor hoë hitte vir sowat 5 minute tot bruin. Verlaag die hitte.
3. Voeg die uie en knoffel by en braai liggies vir 2 tot 3 minute tot glanserig.
4. Voeg die paprika, swartpeper en orego by en braai weer liggies.
5. Voeg die hoenderaftreksel, rooiwyn, xilitol en Tabasco by en laat dit vir 5 minute saam prut.
6. Voeg laastens die tamatiepasta, blikkie tamaties, suurlemoensap, amandelmeel en lourierblare by. Roer om alles goed te meng. Laat weer vir 5 minute prut en geur met sout.
7. Plaas die deksel op die pot en bak in die oond vir sowat 1 uur.
8. Sit voor in bakkies met ʼn skeppie suurroom en garneer met pietersielie en, in my oom se eie woorde: “Geniet saam met swaar rooiwyn en goeie geselskap.”

Bron: Armand kook kaal Volume 2 deur Armand Aucamp
Uitgewer: Lapa