Resep-video: Maalvleispasteitjies

Maalvleispasteitjies (Foto: Elsabé Erasmus/Maroela Media)

Trek hierdie resep volgende keer nader wanneer jy kopkrap oor wat in môre se kosblik moet kom. Die resep is ook ʼn lekker opsie wanneer jy iets na ʼn vingerete wil neem. Die resep lewer sowat 12 pasteitjies.

Bestanddele

• 30 ml sonneblomolie
• 500 g maalvleis
• ½ ui, fyngekap
• 2 wortels, gerasper
• sout en peper na smaak
• 5 ml droë gemengde kruie
• 2 eier, geklits (hou apart)
• 100 g mozzarellakaas, gerasper
• 2 velle blaardeeg, in 12 blokke gesny

Metode

1. Voorverhit die oond tot 180 °C.
2. Verhit die sonneblomolie in ʼn pan en braai die maalvleis en uie tot gaar.
3. Voeg die wortels by en braai verder vir sowat 2 minute.
4. Geur met sout, peper en gemengde kruie en braai weer vir sowat 5 minute.
5. Voeg een geklitste eier en kaas by en meng alles goed.
6. Spuit ʼn muffinpan met kleefwerende kossproei.
7. Sny die blaardeeg in vierkante en plaas dit in die holtes van die muffinpan om bakkies te vorm.
8. Skep die vulsel in die blaardeeg en knyp dan die punte van die blaardeeg toe sodat die vulsel binne is.
9. Verf die res van die geklitste eier bo-oor die pasteitjies.
10. Bak vir sowat 20 minute in die oond totdat die deeg bros en ligbruin is.