Resep: Worsie en kruierysgereg

Middagete in ʼn japtrap! Jy kan ook ʼn geposjeerde eier bo-op elke porsie bedien.

Lewer 4 porsies

Bestanddele

• bietjie olie
• 1 ui, gekap
• 5 ml gekapte vars knoffel
• 375 g (1 pakkie) Enterprise Country-worsies, in happiegroottes gesny
• 1 rooi soetrissie, in blokkies gesny
• 1 geel soetrissie, in blokkies gesny
• 30 ml gekapte vars pietersielie
• 15 ml gekapte vars basiliekruid
• 30 ml gekapte vars koljander
• 3 vars origanumblare, gekap
• paar tiemieblaartjies, gekap
• sout en varsgemaalde swartpeper na smaak
• 750 ml gaar rys

Metode

1. Verhit die olie en soteer die ui en knoffel daarin tot sag. Voeg die worsies by en soteer tot gaar.
2. Voeg die soetrissies by en soteer nog ʼn rukkie.
3. Voeg die kruie by en soteer nog 5 minute. Geur met sout en peper na smaak.
4. Meng die rys by die worsiemengsel en verhit.
5. Sit warm as ligte middagete voor.

Bron: Lekker & Vinnig: Worsgeregte (Uit: Vinnig en maklik-resepte uit Vrouekeur 3 deur Marlo Carstens)
Uitgewer: Lapa