Landbougroep troef ʼn onstuimige boekjaar

Agra Bank, Windhoek ring. (Foto: agra.com.na)

Agra het einde Januarie sy tweede boekjaar onder die deurlopende gevolge van die wêreldwye Covid-19-pandemie binnegegaan, wat maatskappye wêreldwyd ernstig beïnvloed het.

Gedurende hierdie tyd het Agra daarin geslaag om deurlopend sy bedryfskoste met voorsorg te bestuur. Dit het die tydelike opskorting van verskeie kapitaalprojekte ingesluit, asook om nie vakante poste vir nienoodsaaklike personeel te vul nie.

“Dit het ons personeel getoets en ons is dankbaar vir hul deursettingsvermoë en volgehoue ​​toewyding,” sê Flip de Bruyn, Agra se finansiële hoofbestuurder. “Verder het ons bykomende maatreëls getref om ons kredietbeheer te verhoog deur vroeë potensiële risiko’s te identifiseer. Ons het egter besluit om gedurende die huidige finansiële jaar voort te gaan om in die uitbreiding van infrastruktuur te belê en om alle vakante poste te vul.”

“Gelukkig is die landboubedryf, wat ʼn primêre bedryf is, nie so erg deur die wêreldwye pandemie geraak soos baie ander bedrywe nie, en ons is baie dankbaar daarvoor,” sê Arnold Klein, Agra se hoof- uitvoerende beampte. “Ons het baie lesse geleer uit die ernstige droogte wat Namibië die afgelope paar jaar geteister het, wat ons gehelp het om die uitdagings van ʼn uiters moeilike handelsomgewing te oorkom.

“Buiten die suidelike en westelike dele van Namibië het die land goeie reën gekry, wat tot ʼn beduidende afname in die verkope van lekke en voer gelei het,” sê Klein. “Aangesien boere hulle tans op die produksie en herbesetting van hul kuddes toespits, het die landboulandskap verander en Agra moes as sodanig aanpas by die veranderende behoeftes van ons kernmark.”

Die algehele omset van die Agra-groep het met 4,7% afgeneem in vergelyking met dieselfde tydperk in 2020, van N$992 miljoen tot N$945 miljoen in 2021.

Die bedryfsuitgawes vir die groep is grotendeels op dieselfde vlak as die vorige boekjaar gehandhaaf, met ʼn geringe toename van slegs 0,5%. As gevolg hiervan het die wins voor belasting in 2020 se boekjaar van N$22,7 miljoen tot N$38,6 miljoen in die 2021-tydperk toegeneem, wat ʼn aansienlike toename van 69,4% vir die eerste ses maande van die boekjaar beteken.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.