Depressie neem toe in Suid-Afrika, veral in die Vrystaat

Foto: Nik Shuliahin/Unsplash

Die aantal mense wat met geestesgesondheidstoestande worstel, neem jaarliks toe wat die koste om dié toestande te dek sedert 2009 met 224% laat styg het.

Volgens die jongste syfers wat deur Discovery Health bekendgemaak is, het dié mediese skema tydens 2018 altesaam R2,6 miljard uitbetaal vir psigiatriese behandelings.

Tydens 2018 is ook sowat 364 746 van Discovery-lede met ʼn geestesgesondheidstoestand gediagnoseer.

Nog meer kommerwekkend is dat die mediese skema se syfers aangedui het dat mense al hoe jonger aan siektes soos depressie of bipolêre versteuring begin ly. Dus word hulle al op ʼn jonger ouderdom gediagnoseer. “In 2009 was die algemene ouderdom vir diagnose ongeveer 40. Deesdae word mense, veral vroue, tussen 16 en 30 jaar oud gediagnoseer,” sê dr. Noluthando Nematswerani, die hoof van Discovery se sentrum vir kliniese uitnemendheid.

Die aantal mans wat vir dié soort siektes behandel word, het oor die afgelope tien jaar met 49% toegeneem tot 11,1% van Discovery-lede. Die aantal vroue het met 37% toegeneem tot 17,9%. Die aantal kinders wat behandel is, het met 18% toegeneem tot 8,2%.

Depressie sal na raming in 2030 die grootste bydraende faktor tot die wêreldwye siektelas wees.

Nematswerani verduidelik egter dat Discovery se uitbetalings aan geestesgesondheidstoestande ook vermenigvuldig het omdat die koste vir die behandeling hiervan, asook die aantal lede wat aan die skema behoort, toegeneem het.

“Binne die skema was depressie die siekte met die meeste uitbetalings, vir mans én vroue, in 2018. Bipolêre versteuring het vir die naasgrootste uitbetalings in dié jaar gesorg,” sê Nematswerani.

Die duurste eis tydens 2018 het R235 272 beloop. Dit het die hospitalisering- en rehabilitasiekoste van ʼn 47-jarige man wat vir bipolêre versteuring en alkohol- en dwelmmisbruik behandel is, gedek.

Discovery het verder aangedui dat 61% van die R2,6 miljard-eise aan behandelings buite die hospitaal bestee is. Die meerderheid was vir medikasie en konsultasies met kliniese sielkundiges, psigiaters en arbeidsterapeute.

Eise vir geestesgesondheidstoestande het bygedra tot 4,5% van alle Discovery-eise wat in 2018 hanteer is. “Ons besteding hieraan het met 15% sedert 2009 gestyg. Pasiënte wat in die hospitaal opgeneem word, het egter vinniger gestyg, naamlik met 31% sedert 2009,” voeg Nematswerani by.

Vrystaat, die hoofprovinsie van depressie

Volgens ʼn tweede verslag van Discovery word die meeste van sy lede in die Vrystaat, om en by 7,3%, met ʼn geestesgesondheidstoestand gediagnoseer.

Discovery Health se geestesgesondheidseiseverslag wys verder dat dié provinsie ook die meeste sielkundiges en psigiaters per pasiënt in die Discovery Health-skema het. “Dit is moontlik hoekom daar meer diagnoses in die provinsie gemaak is,” volgens die verslag.

Die Oos-Kaap het die naasmeeste diagnoses gehad, met 6,6%. In Gauteng is 6,1% van die diagnoses landwyd gemaak.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Sieg

So waar wat kan jy verwag met n regering wat meer as 180 wetgewing teen die wit Suid-Afrikaner het om werk te kry en te leek in SA!

gedagte

my hart gaan na elkeen uit wat aan drepressie ly. dit lei ook tot selfmoord

JC

Almal het iets om oor depressief te wees. Veral die jongmense van die land, want watse vooruitsigte is daar vir ons?

Leser

Wat veroorsaak bipolêre versteuring? Kom die siekte ook voor wanneer mense dwelms / alkohol in oormaat gebruik? Wat van hulp vir die families van so iemand, hulle kry depressie oor hulle daaraan blootgestel word en klaarblyklik niks daaraan kan doen want die lyer wil nie hulp kry nie. ‘n Artikel oor dié siekte (met feite) sal waardeer word.

Tante

Hierdie land en die wereld regeerders is rede om enige mens depressief te maak net die vooruitsig na die ewige lewe hiera behoort elkeen te vul met vreugde. Gelukkig is die lwew hier net tydelik en die nou paadjie dis waar jy getoets word en depressie loer en wag vor jou Hou jou visie op die ewigheid en help ander ook om blymoedig daarop te wag dan sal depressie jou nie oorval Sterkte almal