Die hele wêreld gons deesdae oor internet-gekoppelde motors wat ʼn ingeboude simkaart in het en dan altyd aan die internet gekoppel is. Dit bring ʼn magdom moontlikhede vir die toekoms.
In dié stadium is daar motors met navigasiestelsel intydse inligting verskaf. Sou ʼn mens in ʼn botsing betrokke wees, skakel die voertuig self die nooddienste en verskaf belangrike inligting soos hoe erg die botsing is. ʼn Mens kan nou ʼn app op jou foon aflaai, en belangrike inligting sien soos jou brandstofvlak en reikafstand. ʼn Funksie waarvan ek baie hou, is dat jy ʼn bestemming op die app op jou foon kan soek en die aanwysings stuur na die motor toe voor jy vertrek… slim.
Nog ʼn puik funksie is die integrasie van Google Earth met Audi se eie navigasiestelsel. As ʼn mens die navigasiestelsel gebruik, sien mens ʼn satellietprentjie van die aarde in plaas van ʼn gewone kaart. Die raakskerm is 10.1” en die resolusie is puik.
Gewoonlik as ʼn model vernuwe word, is dit ʼn paar klein veranderings aan die ligte en dies meer. Dié A4 het ʼn bietjie meer as net plastiese chirurgie gehad. Onder die vel begin die nuwe A4 nou hibridiese tegnologie bevat. Dit is ʼn 12 V-stelsel wat energie herwin om die aansitter en bykomstighede soos die ligte, ruitveërs en so aan te laat werk. Daar is reeds turbopetrolenjins beskikbaar in die A4-reeks. Kraglewering sal tussen 110 kW en 260 kW wees. Alle A4-modelle het outomatiese ratkaste.
ʼn Dieselenjin sal by die reeks gevoeg word in die eerste kwartaal van 2021. Die A4-reeksleier kom in die vorm van die puik Audi S4. Hy word deur ʼn V6-turbopetrolenjin aangedryf wat 260 kW en 500 Nm lewer. Dit neem 4,7 sekondes van 0 – 100 km/h en die S4 is beperk tot 250 km/h.
Ons sal binnekort tyd met die A4 deurbring en kan dan ʼn beter idee gee van hoe die opknappings voel op die pad. Die A4 is ook nou een van die bekostigbaarste mededingers in sy segment.
Die reeks lyk só:
Audi A4 35 TFSI Standard | 110 kW/270 Nm | R644 000 |
Audi A4 35 TFSI Advanced | 110 kW/270 Nm | R663 000 |
Audi A4 40 TFSI Standard | 140 kW/320 Nm | R681 500 |
Audi A4 40 TFSI Advanced | 140 kW/320 Nm | R700 500 |
Audi A4 40 TFSI S Line | 140 kW/320 Nm | R726 500 |
Audi S4 | 260 kW/500 Nm | R944 500 |
Die reeks word gedek deur ʼn 5 jaar/100 000 km- omvattende instandhoudingsplan.
Sy mededingers lyk só:
Alfa Romeo Giulia 2.0T | 147 kW/330 Nm | 5,9 ℓ/100 km | 3 jaar/100 000 km-waarborg 6 jaar/100 000 km- omvattende instandhoudingsplan | R620 557 |
BMW 318i | 115 kW/250 Nm | 6,3 ℓ/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R667 724 |
Mercedes-Benz C180 | 115 kW/250 Nm | 6,5 ℓ/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R696 360 |
Lexus IS 300 EX | 180 kW/350 Nm | 7,5 ℓ/100 km | 7 jaar/105 000 km-waarborg en omvattende instandhoudingsplan | R747 800 |
Jaguar XE P250S | 184 kW/365 Nm | 6,3 ℓ/100 km | 5 jaar/100 000 km-waarborg en omvattende instandhoudingsplan | R790 162 |
Dié mededingers is elkeen die goedkoopste model beskikbaar in hul reekse.