So lyk BMW se nuwe 840i Gran Coupé. (Foto: Brendon Staniforth)
Ek het nou al met drie 8-reeks-BMW’s tyd deurgebring. Die eerste was die kragtige M850i. ʼn Turboaangejaagde tweedeur-, 2+2 sitplek-V8-vuurpyl. Toe kom die barbaarse M8 Competition. Selfde uitleg, méér krag. Waansin. En toe kom die 840i Gran Coupé. Geen M-lettertjie in sig nie – en na my mening is dít wat die 8-reeks nog altyd moes wees.
Hierdie sogenaamde grand tourer blink uit op die pad. (Foto: Brendon Staniforth)
ʼn Ware 5-sitplek- hiperluukse grand tourer. Wat’s die verskil? Die Gran Coupé het vier deure en ʼn langer asafstand – so, daar is plek vir dié wat agter inklim se bene. Die 840i word aangedryf deur ʼn romerige turboaangejaagde inlynsessilinderenjin en die resultate is puik.
Dis ʼn pragtige wa, met leer en luuksheid in oorvloed. Die 40i-enjin is puik en bied 80% van die verrigting van die 50i, met die helfte van die brandstof. Hy is geensins stadig nie en bied 250 kW en 500 Nm. Ja, 0–100 km/h neem slegs 5,2 sekondes en hy is beperk tot 250 km/h. Al daai syfers beteken eintlik ook niks nie. Dit is die gevoel van die 840i. Hy is sagter, meer stylvol as sy twee waansinnige boeties.
Dis ʼn pragtige wa, met leer en luuksheid in oorvloed.
Die ontwerp is nie supermotor-mooi soos die M8 nie, maar dis beslis meer elegant. Aan die binneruim is die voorste sitplekke en paneelbord presies dieselfde. Agter is waar dinge meer prakties is. Daar is behoorlike beenruimte en drie sitplekke agter: eintlik twee met ʼn armleuning wat kan toevou met gordels vir indien daar ʼn derde tjokker is wat sitplek soek.
Op die pad is waar die 840i uitblink. Ons het tydens ons toets een aand ʼn BMW i8 raakgetoer. Van verkeerslig tot verkeerslig is die i8 net-net vinniger as die 840i. Indrukwekkend, aangesien dit die baba in die reeks is. Teen 120 km/h op die oop pad bied hy puik brandstofverbruik. BMW beweer ʼn syfer van 7,9 ℓ/100 km wat hulle in die laboratorium tydens die WLTP-toets bereik het.
Dit is maklik om die 840i op te som. Dit is elegant en het asemrowende bougehalte. Die enjin is meer as wat 99% van die eienaars ooit sou benodig en ook baie minder onbeskof as die M850i en M8 – al is hul verrigting onweerlegbaar.
Die reeks lyk só:
| BMW 840i Gran Coupé | 250 kW/500 Nm | 7.9 ℓ/100 km | R1 547 230 |
| BMW 840d xDrive Gran Coupé | 235 kW/680 Nm | 6.9 ℓ/100 km | R1 633 278 |
| BMW M850i xDrive Gran Coupé | 390 kW/750 Nm | 10.7 ℓ/100 km | R2 060 000 |
| BMW M8 Competition Gran Coupé | 460 kW/750 Nm | 10.7 ℓ/100 km | R3 246 462 |
Die mededinging lyk só:
| Audi A7 Sportback 55TFSI quattro | 250 kW/500 Nm | 7.1 ℓ/100 km | 1 jaar/onbeperkte km-waarborg 5 jaar/100 000 km- omvattende instandhoudingsplan | R1 298 000 |
| Mercedes-Benz CLS400d 4Matic | 250 kW/700 Nm | 6 ℓ/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R1 342 360 |
| Porsche Panamera 4 | 243 kW/450 Nm | 8.8 ℓ/100 km | 2 jaar/onbeperkte km-waarborg 3 jaar/100 000 km- omvattende instandhoudingsplan | R1 701 000 |
Tussen dié mededingers is daar ʼn paar opsies. Die 840i is werklik pragtig en ʼn winskoop teen die prys.
