Betroubaarheid belangriker as net lekker

Die Land Rover Discovery. (Foto: Verskaf)

Elke motorjoernalis het ʼn skuldige plesiertjie. Daai motor waarna hulle smag, maar om een of ander rede net nie kan besit nie weens verskeie redes. Myne is ʼn Land Rover Discovery. Ek droom van ʼn Discovery 4 SDV6 HSE.

Kom ek verduidelik hoekom ek nie een kan besit nie. ʼn Kennis sê nou die dag: “My pa het altyd gesê as jy nie ʼn luukse motor nuut kan bekostig nie, kan jy nie bekostig om hom tweedehands te onderhou nie!” Dit is die reine waarheid.

ʼn Discovery 4 pas my leefstyl perfek, dis pragtig, het sewe sitplekke en kan ʼn karavaan sleep… wat meer wil mens hê? Die probleem? Sy lugvering se skokbrekers is nie die betroubaarste op aarde nie, en hulle kos R10 000 elk om te vervang. ʼn Vriendin se man het nie lank terug nie een gekoop – en toe kort hy ʼn nuwe turbo. Die hele oefening was op die ou end baie naby aan R100 000. So, ek kan self nie ʼn R1,3 m se Discovery Landmark nuut bekostig nie en ek sou versigtig wees vir hom buite waarborg.

Die Land Rover Discovery. (Foto: Verskaf)

Die ontwerp self is netjies. Pragtig van voor, en effe vreemd van agter, maar algeheel is dit ʼn netjiese ontwerp. Die binneruim is pure Discovery. Luuks, ergonomies en groot. Die eerste Landmark wat ek onder hande gehad het, was ʼn SE-model, toe het hy ʼn elektroniese gogga en word met ʼn HSE vervang.

Die SE het gewone meganiese metertjies, en die HSE het die digitale skerm wat al die inligting vir jou uitbeeld. Die SE-weergawe het ʼn sterk spesifikasievlak, maar die HSE is uit die boonste rakke met sitplekgeheue, parkeerkameras en ʼn magdom truuks. Aan die veiligheidskant is daar ­­ses lugsakke, ABS met EBD, vastrap- en stabiliteitsbeheer sowel as Land Rover se puik “terrain response” – veldrystelsel.

Die Discovery se 3.0 V6-turbodieselenjin is fantasties. Dit bied 190 kW en 600 Nm. Die enjin is gepaard aan Land Rover se 8-spoed‑ outomatiese ratkas. As ʼn mens rustig toer met die Discovery bied hy selfs goeie brandstofverbruik teen 7,5 ℓ/100 km. Die Discovery kan 3 500 kg sleep.

Op die pad voel die Discovery super luuks. Hy toer stil en sag en het oorgenoeg krag. Die lugvering maak sagte werk van slegte paaie en spoedhobbels. Die Discovery se padhouvermoë is indrukwekkend vir ʼn voertuig van dié grootte en wat só hoog is.

Dit is maklik om die Discovery op te som. Dit is ʼn lieflike voertuig, maar die meganiese goggas pla my. Ek en ʼn pel vra gereeld: “Maar sou jy in Namibië infoeter met hom?”… sonder ander mense in ʼn konvooi? Nee.

Die reeks lyk só:

Die kompetisie lyk só:

Indien jy ʼn Discovery nuut kan bekostig en hom ry tot sy waarborg en instandhoudingsplan verstryk, en dan verkoop en ʼn ander een koop, koop dit gerus, dis ʼn lieflike ryding. Vir my is die Prado die enigste ware 7-sitplek 4×4-mededinger vir die Discovery – sy betroubaarheid is wat die skaal vir my in sy guns laat swaai.