Ons het geruime tyd gelede foto’s van die splinternuwe C-klas gesien. Dit is werklik beeldskoon, maar op ʼn konserwatiewe manier. Die motor het baie ooreenkomste met die S-klas, maar dis nie noodwendig sleg nie. Die ontwerp is na my mening uiters elegant en die binneruim is selfs beter – ʼn enorme skerm, pragtige paneelbord met digitale instrumente.
Die foto’s kon my egter nie voorberei op die ware Jakob nie. Min mense weet dat die C-klas hier in Suid-Afrika in Mercedes-Benz se fabriek in Oos-Londen gebou word en die bougehalte is indrukwekkend.
Ek het twee C-klasse onder hande gehad – eers ʼn C220d en toe ʼn C200. Ek was aanvanklik skepties oor die 200 se 1.5‑viersilinderturbopetrolenjin omdat ek nie gaande is oor die kombinasie van die 1.3‑viersilinder en dubbelkoppelaarouto wat in die A-klas te vinde is nie. Hoewel ek aangenaam verras was deur die 1.5 in die C-klas, is die enjin steeds nie so goed soos die C220d nie. Die petrol‑C-klas bied 150 kW en 300 Nm. Die enjin is relatief stil en nie uitermatig swaar op brandstof nie, maar die diesel se 2.0‑viersilinderturbo bied 147 kW en 440 Nm. Die ekstra wringkrag werk fantasties saam met Mercedes se 9G-tronic 9-spoed‑ outomatiese ratkas. Die kombinasie is boonop uitermatig lig op brandstof. Die manier waarop dit die omwentelinge laag hou en eerder wringkrag gebruik om die C-klas stilletjies vorentoe te laat beweeg, is luukser as die petrol se ratse ratwisselings en growwer voorkoms.
Op die pad beïndruk die C-klas nog meer. Die C200 met AMG Line het vierwielstuur, maar albei voertuie het ʼn baie soepel rit, ten spyte van die 18”‑ en 19”‑wiele. Ek is met die C200 in ʼn enorme storm gevang, maar die Benz se outomatiese ruitveërs het ligte werk van al die water gemaak en die puik LED‑ligte was selfs meer indrukwekkend.
Albei motors kom met ses lugsakke, sluitweerremme met elektroniese remkragverspreiding, vastrap‑ en stabiliteitsbeheer, baanhulp met blindekolwaarskuwing en botsingwaarskuwing‑noodremhulp.
Dit is bitter maklik om die nuwe C-klas op te som. Die C220d is beslis die lekkerder kar om te ry en gebruik omtrent 5,7 ℓ/100 km – werklik goed en die voertuig is pragtig gebou met lieflike materiale. Met al die groot sportnutsvoertuie wat beskikbaar is, vergeet ons soms hoe lieflik ʼn sedanmotor is om te bestuur.
Die reeks lyk só:
Mercedes-Benz C200 AMG Line | 150 kW/300 Nm | 6,8 ℓ/100 km | R911 956 |
Mercedes-Benz C220d Avantgarde | 147 kW/440 Nm | 4,7 ℓ/100 km | R912 599 |
Die reeks word gedek deur ʼn 2 jaar/onbeperkte km‑waarborg en 5 jaar/100 000 km‑ omvattende instandhoudingsplan.
Die kompetisie lyk só:
Audi A4 35TDI | 110 kW/320 Nm | 5 ℓ/100 km | 1 jaar/onbeperkte km-waarborg 5 jaar/100 000 km‑ omvattende instandhoudingsplan | R750 700 |
BMW 320d | 140 kW/400 NM | 4,6 ℓ/100 km | 2 jaar/onbeperkte km‑waarborg 5 jaar/100 000 km‑ omvattende instandhoudingsplan | R839 858 |
Lexus IS300h EX | 164 kW/221 +e Nm | 5,2 ℓ/100 km | 7 jaar/105 000 km‑waarborg en omvattende instandhoudingsplan 8 jaar/195 000 km‑batterywaarborg | R906 100 |
Malligheid om bykans 1 miljoen rand vir ‘n 1500cc enjintjie te betaal.
Jy’s reg. Ek kan heelwat meer doen met ‘n miljoen.
Jy is nie die teikenmark nie, duidelik, Die ministers is die teikenark, Hulle gaan enetjie koop met ons belasting geld.
Al 4 die ministers se gunstelling karre. Hulle sal elk enetjie kry met ons belasting geldjies.
Die ministers kry R700000 maar seker Mercedes het nie ‘n probleem om lekker afslag te gee. Afslag wat die man in die straat nie sal kry!
Maak ligte werk van die water?
As daai skerm grooter word sal die passisiers sitplek uit gehaal moet word!