Die blitsigste blitsbuks in Suid-Afrika

Die Mercedes-AMG A45S.

Daar is ʼn handjie vol luikrugvoertuie wat baklei om die titel van die vinnigste… die hiperluikrug. In dié klas sou ek Volkswagen se Golf R, Audi se RS3, BMW se M135i, Ford se Focus RS, Honda se Civic Type R, Hyundai se i30N, Renault se Megane RS Trophy en dan Mercedes-AMG se 35 en 45 A-klas plaas.

Die Megane, Civic en i30N gaan ek uit dié geveg uithaal omdat hul slegs voorwielaandrywing het. Ford se Focus RS is nie meer in SA beskikbaar nie; so dit los die Golf R, Audi S3, BMW M135i en AMG’s. Ek het onlangs oor die 35 geskryf – maar hier gaan ons oor die grootboet praat – die A45S en CLA 45S.

Die ontwerp is tot ʼn mate steeds A-klas, maar met al die vlerkies en vinne vasgemaak wat hulle kon… om twee redes. Eerstens laat dit die A45S werklik stout lyk en tweedens help dit vir lugdinamika. ʼn Mens moet onthou dat die A45S amper 300 km/h kan haal… IN ’N LUIKRUG!

Die Mercedes-AMG A45S.

Mercedes-AMG is in hierdie stadium die baas van die binneruimspeletjie. Hul binneruim lyk fantasties, hipermodern met al die truuks wat dié koper soek – van LED-beligting tot reuseraakskerms wat elke denkbare brokkie inligting vir mens mooi uitbeeld, presies soos wat jy daarvan hou.

Dit bring my na die stukkie waar ek gesels oor die enjin en dryfstelsel. Sjoe! Die 45S-weergawe van Mercedes-AMG se aanbieding is fantasties. Dit is ʼn 2.0-viersilinderturbopetrol wat 310 kW en 500 Nm bied. ʼn Stewige 300 kilowatt in ʼn klein gesinsbuksie!? Van 0 – 100 km/h neem ʼn ratse 3,9 sekondes en die 45S sal aanhou snol tot ʼn elektronies-beperkte 270 km/h.

Die Mercedes-AMG CLA45S.

Gelukkig is veiligheid ewe belangrik vir Mercedes-AMG as die werkverrigting. Die A45S en die CLA45S het sewe lugsakke met nog twee opsioneel beskikbaar, ABS, EBD, vastrap- en stabiliteitsbeheer, botsing- en blindekolwaarskuwing, baanbeheer – die hele katoet. Die remskywe is ewe indrukwekkend teen 350 mm voor en 330 mm agter – heeltemal sterk genoeg om die A-klas tot stilstand toe te bring vanaf 270 km/h in die kortste afstand moontlik.

Op die pad is dit verbasend hoe gemaklik albei voertuie is. As ʼn mens se voet nie in die mat begrawe is nie, dan bêre die 45 sy naels en raak so mak soos ʼn lammetjie. Ja, die rit is hard – dis te verstane, maar die padhouvermoë is fantasties. Dié twee AMG’s ry met Michelin Pilot 4S-bande; waarskynlik my gunstelinghoëverrigtingbande op die oomblik.

Dit is bitter maklik om dié twee op te som: Dit is twee blitsbuksies wat hul man kan staan teen die bestes op die mark. Die prys is kwaai, maar dit bly ʼn AMG.

Die reeks lyk só:

Die kompetisie lyk só:

Tussen dié mededingers is die Golf R en Audi S3 nie eintlik mededingers nie en val in die klas onder die 45. Ons sien vroeg in 2021 die nuwe Audi RS3 – hy sal wel saam die 45 kan hardloop. Die BMW M2 Competition is die enigste direkte mededinger, maar het nie vierwielaandrywing nie – maar is my keuse vanweë sy 6-silinderenjin en agterwielaandrywing.