Moderne tegnologie is darem fantasties. Duur, ja – maar steeds puik. Veertig jaar terug was die meeste voertuie ʼn “one-trick pony”. Dit was óf ʼn handelsvoertuig, óf ʼn luikrug, ʼn sedan of ʼn bakkie. Dit was omtrent die storie. Deesdae is daar vuurvretende sportnutsvoertuie … elektriese 4×4’s en allerhande vreemdhede.
Ek het onlangs tyd met ʼn Range Rover Sport P400e deurgebring. Ek krap my kop – maar dit is moontlik een van die veelsydigste voertuie wat ek al ooit bestuur het. Kom ek verduidelik hoekom. Die Range Rover Sport is ʼn ware 4×4 vol vet met ʼn laestrekratkas en lugvering wat die grondvryhoogte kan lig tot ʼn indrukwekkende 278 mm. So, hy kan berg klim.
Reg, dan het die spesifieke model ʼn 2.0-viersilinderturbopetrolenjin wat 221 kW en 400 Nm bied. Maar dis nie al nie. Daar is ʼn elektriese motor wat die algehele stelsel se krag stoot na 297 kW en 640 Nm. Dit is sterk genoeg om dié meneer van 2,5 ton van 0 tot 100 km/h te slinger in 6,7 sekondes en hy sal aanhou draf tot ʼn behoorlike 220 km/h. So, hy kan snol.
Dieselfde gereedskap wat hom help om só te snol, help hom ook om ʼn stadskarretjie te wees. Die Range Rover Sport P400e het ʼn 85 kW/240 Nm- elektriese motor. Die 13.1 kWh-battery is goed vir 51 km lange slégs elektriese reikafstand … óf jy kan die voertuig net los om sy eie ding te doen en die reikafstand aan te vul soos mens ry.
Dit op sigself, en die feit dat jy hom inprop by die huis, is nie die hele prentjie nie. Wat die tegnologie fantasties maak, is die feit dat die Range Rover krag deur die remme herwin en stoor, om jou weer aan die gang te help as jy wegtrek. Dit klink eenvoudig, maar is waarskynlik bitter ingewikkeld – maar die slotsom is dat mens in ʼn Range Rover lag-lag 10 ℓ/100 km kan handhaaf op die oop pad in Suid-Afrika, en so laag soos 6.1 ℓ/100 km in die dorpsverkeer.
Die 13.1 kWh-battery sal, as hy dolleeg is, in die omgewing van R26 kos om te herlaai by die huis. Die voertuig kom met ʼn 10 amp-kabel, wat die battery vol kan laai in sewe uur en 30 minute, óf mens kan ʼn vinniger 32 amp-laaier laat installeer wat dit in twee uur en 45 minute kan doen. Ek dink dis regtig nie nodig nie, want die Range Rover hét wel ʼn 90 ℓ-brandstoftenk – so, mens kan net volgooi en weer laai wanneer dit gemaklik is. Dus, hy’s ekonomies.
Goed, hy kan “4×4”, hol én is ekonomies. O, en moenie vergeet van die luuksheid nie. ʼn Range Rover is ʼn lieflike voertuig om in tyd te verwyl, in die dorp of op die oop pad. Die Meridian-klankstelsel is puik, en die Range Rover bied ʼn magdom truuks soos WiFi en USB-poorte om almal se fone gelaai en gekoppel te hou.
Op die pad is dit eenvoudig – die Range Rover is lieflik stil, dit ry soos ʼn droom. Wat dit nóg lekkerder maak, is: Waar die teer eindig, sal jou Range Rover ongedeerd aanhou … terwyl jou Coke in die yskassie tussen die sitplekke koud bly. Baie lande in Europa begin binnebrandenjins in hul groot stede verbied. Die Range Rover sal eenvoudig in EV-modus verder gaan sonder om afgeskrik te word. By die huis aangekom, laai jy hom weer, haak die woonwa en sleep tot 2,5 ton. Fantasties.
Die reeks lyk só:
Range Rover Sport S Si4 | 221 kW/400 Nm | 9.2 ℓ/100 km | R1 240 308
|
Range Rover Sport SE Si4 | 221 kW/400 Nm | 9.2 ℓ/100 km | R1 300 908
|
Range Rover Sport S P360 | 265 kW/450 Nm | 9.2 ℓ/100 km | R1 326 784
|
Range Rover Sport S TDV6 | 190 kW/600 Nm | 7.8 ℓ/100 km | R1 363 556
|
Range Rover Sport SE TDV6 | 190 kW/600 Nm | 7.8 ℓ/100 km | R1 375 556
|
Range Rover Sport SE P360 | 265 kW/450 Nm | 9.2 ℓ/100 km | R1 389 184
|
Range Rover Sport SE SDV6 | 225 kW/700 Nm | 7.0 ℓ/100 km | R1 497 720
|
Range Rover Sport HSE TDV6 | 190 kW/600 Nm | 7.8 ℓ/100 km | R1 528 956
|
Range Rover Sport HSE Si4 | 221 kW/400 Nm | 9.2 ℓ/100 km | R1 529 708
|
Range Rover Sport HSE P360 | 265 kW/450 Nm | 9.2 ℓ/100 km | R1 624 884
|
Range Rover Sport HSE SDV6 | 225 kW/700 Nm | 7.0 ℓ/100 km | R1 770 820
|
Range Rover Sport HSE P400e | 297 kW/640 Nm | 2.8 ℓ/100 km | R1 785 600
|
Range Rover Sport HSE Dynamic P400e | 297 kW/640 Nm | 2.8 ℓ/100 km | R1 833 500
|
Range Rover Sport Autobiography Dynamic P400 | 294 kW/550 Nm | 9.2 ℓ/100 km | R1 841 532
|
Range Rover Sport HSE Dynamic Supercharged | 386 kW/625 Nm | 13.6 ℓ/100 km | R1 952 070
|
Range Rover Sport HSE Dynamic SDV8 | 250 kW/740 Nm | 8.7 ℓ/100 km | R1 965 492
|
Range Rover Sport Autobiography Dynamic P400e | 297 kW/640 Nm | 2.8 ℓ/100 km | R1 976 000
|
Range Rover Sport Autobiography Dynamic SDV8 | 250 kW/740 Nm | 8.7 ℓ/100 km | R2 176 392
|
Range Rover Sport Autobiography Dynamic Supercharged | 386 kW/625 Nm | 9.2 ℓ/100 km | R2 232 470
|
Range Rover Sport SVR | 423 kW/700 Nm | 13.6 ℓ/100 km | R2 555 970
|
Die reeks word gedek deur ʼn 5 jaar/100 000 km-waarborg en omvattende instandhoudingsplan.
Die kompetisie lyk só:
Lexus RX450h SE | 230 kW/335 +e Nm | 5.7 ℓ/100 km | 7 jaar/105 000 km- waarborg en omvattende instandhoudingsplan | R1 368 900 |
BMW X5 xDrive45e xLine | 290 kW/600 Nm | 2.5 ℓ/100 km | 2 jaar/onbeperkte km-waarborg 5 jaar/100 000 km- omvattende instandhoudingsplan | R1 460 000 |
Porsche Cayenne E-Hybrid | 340 kW/700 Nm | 3.4 ℓ/100 km | 2 jaar/onbeperkte km- voertuigwaarborg 8 jaar/160 000 km- batterywaarborg 3 jaar/100 000 km- omvattende instandhoudingsplan | R1 832 000 |
Met daai pryse behoort dit veelsydig te wees, wie sal nou 4×4 wou ry met so voertuig, daar is soortgelyke modelle teen die baie goedkoper.
Bietjie dik vir n daalder,eerstens gaan bitter min die voertuig gebruik vir rowwe terrein,het jare in Saudi gewerk en die Land Rovers hou nie lank nie,daarom gebruik die Saudi’s Toyota,die beste 4×4 op aarde..