Sou ek ʼn motorvervaardiger wees met ʼn model in die intreesegment, dink ek sou my strategie wees om ʼn buksie te ontwerp waarvan die proporsies klein is, maar wat glad nie soos ʼn klein karretjie voel nie. Dit moet nie ʼn straf wees om met ʼn A-segment karretjie te ry nie… Gelukkig het Kia my voorgespring.
Die Kia Picanto is al geruime tyd op my radar. Sedert sy plaaslike bekendstelling in 2004 het die Picanto net van krag tot krag gegaan en sedertdien al derduisende Picanto’s verkoop. Kia het ons onlangs genooi om te kyk na hul jongste Picanto… die X-LINE. Dit is ʼn Picanto met ʼn mooi pak aan wat hom taaier laat lyk, soos ʼn kruismodel.
Die Picanto is beskikbaar in ʼn reeks kleure. Ja, daar is die vervelige wit en silwer, maar daar is ook ʼn fantastiese rooi, geel, groen en oranje. Die ontwerp aan die eksterieur is werklik mooi. Nie net mooi vir ʼn klein karretjie nie – maar voorwaar mooi. In die binneruim kry ʼn mens meer daarvan. Kia het nie in die afgelope paar jaar verniet klomp ontwerp-toekennings opgeraap nie.
Kia is ook ʼn handelsmerk wat al vir jare bó aan JD Power se aanvanklike kwaliteitstudie is, en ʼn mens kan dit voel. Dit is ʼn mooi kajuit wat slim uitgelê is. Alles is ergonomies binne die bestuurder se reik geplaas, en die spesifikasievlak beïndruk. Daar is outomatiese ligte, klimaat beheer, ʼn 8”-raakskerm wat met Apple Carplay en Android Auto toegerus is.
Die X-LINE word aangedryf deur Kia se aangename atmosferiese 1,2 viersilinderpetrolenjin. Die motor het ʼn 5-spoed handratkas met seepgladde aksie, én ʼn lekker ligte koppelaar. Dít, gepaard met goeie kalibrasie van die versneller en ʼn ligte stuurgevoel bied ʼn puik bestuurservaring in en om die dorp, én op die oop pad.
Op die pad ry die Picanto lekker sag en die sitplekke bied goeie steun, al is ek nie gaande oor die kunsleer wat op die sitplekke gebruik word nie. Indien daar ʼn opsie is vir doodgewone bekleedsel sal ek dit beslis neem want ʼn mens sweet maklik op kunsleer.
Dit is baie maklik om die Picanto op te som. Dit is ʼn goedkoper tjor waarvoor mens geen verskonings hoef te maak nie. Dit ry lekker, bied billike spasie en sterk spesifikasie. Dit is een van die min klein buksies waar mens trots kan voel oor die ontwerp… self ʼn bietjie wintie wees.
Die reeks lyk só:
Kia Picanto 1.0 Start | 49 kW/ 95 Nm | 5,0 ℓ/ 100 km | R187 995 |
Kia Picanto 1.0 Start outo | 49 kW/ 95 Nm | 5,3 ℓ/ 100 km | R201 995 |
Kia Picanto 1.0 Street | 49 kW/ 95 Nm | 5,0 ℓ/ 100 km | R201 995 |
Kia Picanto 1.0 Runner paneelwa | 49 kW/ 95 Nm | 5,0 ℓ/ 100 km | R207 995 |
Kia Picanto 1.2 Street | 61 kW/ 122 Nm | 5,0 ℓ/ 100 km | R210 995 |
Kia Picanto 1.0 Style | 49 kW/ 95 Nm | 5,0 ℓ/ 100 km | R211 995 |
Kia Picanto 1.0 Street outo | 49 kW/ 95 Nm | 5,3 ℓ/ 100 km | R215 995 |
Kia Picanto 1.2 Style | 61 kW/ 122 Nm | 5,0 ℓ/ 100 km | R220 995 |
Kia Picanto 1.2 Street outo | 61 kW/ 122 Nm | 5,9 ℓ/ 100 km | R224 995 |
Kia Picanto 1.0 Style outo | 49 kW/ 95 Nm | 5,3 ℓ/ 100 km | R225 995 |
Kia Picanto 1.2 Style outo | 61 kW/ 122 Nm | 5,9 ℓ/ 100 km | R234 995 |
Kia Picanto 1.2 X-Line | 61 kW/ 122 Nm | 5,0 ℓ/ 100 km | R237 995 |
Kia Picanto 1.2 X-Line outo | 61 kW/ 122 Nm | 5,9 ℓ/ 100 km | R251 995 |
Die reeks word gedek deur ʼn 5 jaar/ onbeperkte km waarborg en 2 jaar/ 30 000 km diensplan.
Die kompetisie lyk só:
Toyota Starlet 1.4 XS | 68 kW/ 130 Nm | 5,1 ℓ/ 100 km | 3 jaar/ 100 000 km waarborg 3 jaar/ 45 000 km diensplan | R219 500 |
Ford Figo Freestyle 1.5 Trend | 91 kW/ 150 Nm | 5,5 ℓ/ 100 km | 4 jaar/ 120 000 km waarborg 4 jaar/ 60 000 km diensplan | R241 100 |
Honda Jazz 1.2 Trend | 66 kW/ 110 Nm | 5,6 ℓ/ 100 km | 5 jaar/ 200 000 km waarborg Geen diensplan | R245 600 |
Suzuki Vitara Brezza 1.5 GL | 77 kW/ 138 Nm | 6,2 ℓ/ 100 km | 5 jaar/ 200 000 km waarborg 4 jaar/ 60 000 km diensplan | R244 900 |
Volkswagen Polo Vivo 1.4 Mswenko | 63 kW/ 132 Nm | 5,9 ℓ/ 100 km | 3 jaar/ 120 000 km waarborg Geen diensplan | R246 900 |
Fiat 500 TwinAir Star | 63 kW/ 145 Nm | 4 ℓ/ 100 km | 3 jaar/ 100 000 km waarborg Geen diensplan | R250 900 |
Renault Sandero 66kW turbo Stepway TechRoad | 66 kW/ 135 Nm | 5,4 ℓ/ 100 km | 5 jaar/ 150 000 km waarborg 2 jaar/ 30 000 km diensplan | R251 900 |
Slegs een van dié mededingers is ʼn opgepompte weergawe van die modelreeks en dis die Figo Freestyle. Dit is waarskynlik die naaste mededinger. Die Figo se enjin is baie sterk en kan nie geïgnoreer word nie. Die Brezza is ʼn baie groter voertuig teen die prys. Die Polo Vivo word plaaslik vervaardig en is ʼn uiters gewilde opsie. Die Fiat 500 bied sewe lugsakke en ʼn pragtige onwerp vir die geld. Daar is tonne opsies in dié prysklas. Maak vir jou ʼn kortlys en werk van daar af. Toetsbestuur beslis almal, want nie almal ry so lekker soos die Picanto nie.
Ek ry ‘n ouer model en dit regtig ‘n aangename goeie rydding
Onthou net, die huidige regime sê dankie vir die geweldige belastings wat by hierdie malpryse ingesluit is. Dink net watter verskil hierdie geld in jou pensioenfonds kan maak. En jy gaan meer terugkry as wat jy insit, nie soos met hierdie ding se herverkoopprys nie.