Dís mos ʼn bus!

Die bussegment is eintlik ietwat van ʼn ongeliefde stiefkind. Daar is nou nie juis duisende opsies nie, én busse is regtigwaar duur. Vanjaar het ons wel die toevoeging van ʼn outomatiese ratkas by Ford se Tourneo Custom gesien, en Volkswagen het hul nuutste Caravelle bekendgestel.

Mercedes-Benz meen dit is steeds nie genoeg liefde nie. Die luuksste bus tot dusver was Merc se V250d in Avantgarde-spesifikasie. Nou het Mercedes-Benz uiteindelik die luuksste van almal gewys –hul V300d Exclusive. ʼn Pragtige bus waar daar sommer met die eerste oogopslag gesien kan word dat mens in weelde kan karwy.

Die binneruim is wel steeds bus. Dit is vorm eerste, voor ontwerp. Die ding moet tog prakties wees. Daar is sewe lieflike individuele leersitplekke, in die derde ry kyk drie vorentoe, in die tweede ry kyk twee agtertoe (wat mens kan omdraai) en voor is die twee sitplekke vir mamma en pappa. Daar is ʼn tafeltjie waarby ʼn mens of kinders allerhande dingetjies kan uitvoer en daar is USB-poorte en lugreëlingluggate vir ʼn vale.

ʼn Fantastiese affêre maak die kattebak uniek. Die glas kan apart oopmaak as ʼn mens nie die hele reusedeur wil oopmaak net vir ʼn skootrekenaar of só nie, en bo-op die stellasie is twee mandjies wat goed slim vashou. Indien ʼn mens groot koffers of inkopies het, maak die groot deur elektronies oop en toe. Albei kantdeure maak self elektronies oop en toe met die druk van ʼn knoppie óf by die deure, voor in die kajuit óf op die sleutel. Die jongste opknapping kry wel nou ʼn nuwer weergawe van Merc se MBUX-inligtingstelsel – ʼn ware aanwins vir die produk.

Dit bring my by die grootste opknapping op dié bus. Die enjin. Ek het al Benz se 300d-enjin ervaar in ʼn ander produk, die GLC 300d koepee. Dit was ʼn juweel daar, en is presies só hier. Dit is ʼn monster van ʼn viersilinderturbodieselenjin wat 176 kW en 500 Nm bied.

Hy loop seepglad en sou ʼn mens die versneller begrawe ry jy skielik ietwat van ʼn bus-AMG! 0 – 100 km/h neem ʼn komieklike 7,8 sekondes, en die V300d sal aanhou hol tot 220 km/h. My kinders sal gaande wees daaroor, maar ek is bevrees dat vroulief op 160 km/h al sou flou word. Darem sal die kinders vroeg wees vir skool.

Op die pad beïndruk die V300d nes ʼn Mercedes kan. Busse is redelik groot en gewoonlik kan hulle lomp voel. Nie die V-klas nie. Dit ry soos ʼn droom, al kan die ritgehalte effe hard voel – maar dit is nodig vir die padhouvermoë om reg te wees. Dit is verstommend hoe min bakrol daar in só ʼn bussie kan wees.

Dit is baie maklik om die V300d op te som. Dit is ʼn pragtige bus, met luukshede vir ʼn vale. Aan die ander kant is dit regtig bitter baie geld. Vir dié wat dit het, en ʼn behoefte het vir ʼn sewesitplekbus – dié bus sal jou nie teleurstel nie.

Die reeks lyk só:

Die reeks word gedek deur ʼn 2 jaar/ onbeperkte km waarborg en 5 jaar/ 100 000 km diensplan.

Die kompetisie lyk só:

Nie een van dié is werklik ʼn direkte mededinger nie, maar dit is die luuksste opsies van dié wat bussies bied, alhoewel die Quantum in seker opsigte luukser is as die Mercedes-Benz, veral met daai lieflike twee elektriese rusbanke in die tweede ry sitplekke.