Dís nie hoe ons Chery ken…

Chery was voorheen in Suid-Afrika beskikbaar en is nou weer terug.

Die voertuie was werklik nie fantasties nie en daar was destyds drie modelle – ʼn QQ3, J2 en Tiggo. Die handelsmerk het verskeie tegniese uitdagings gehad, maar die publiek het steeds gehou van die uiters goeie waarde wat hul gebied het, en die tjorries gekoop.

My eerste toetsvoertuig van 2022 is Chery se nuwe Tiggo 4 Pro. Ons het die voertuig vinnig onder hande gehad by Gerotek, wes van Pretoria. Ek was werklik beïndruk, maar wou weet presies wat hy kos en vir ’n ruk met hom saamleef.

Die ontwerp is werklik netjies. Dit is ʼn B-segment‑sportnutsvoertuig met lekker proporsies en ʼn sportiewe voorkoms. Dit is egter aan die binneruim waar die Chery jou stomslaan. Dit lyk eerder soos ʼn luukse motor wat dekades se ondervinding agter die rug het.

Die Chery Tiggo 4 Pro se spesifikasievlak is fantasties! Daar is elke denkbare luuksheid. Apple CarPlay en Android Auto, spoedkontrole, leerbekleedsel, stembeheer, outomatiese ligte en ruitveërs – alles! Ek sal hier byvoeg dat die sitplekke met kunsleer oorgetrek is, en as die Suid-Afrikaanse son warm bak, dan sweet mens maklik.

Onder die kap skuil Chery se 1.5‑ turboaangejaagde viersilinderpetrolenjin. Die enjin bied ʼn indrukwekkende 108 kW en 210 Nm. Dis lekker sterk, maar die enjin kan effens grof voel as jy hard versnel. Die palwisseltransmissie (CVT) maak goeie werk van die wringkrag wat die enjin bied en as jy billik met die versneller werk, soek hy nie té erg rond nie. Waar die enjin wel vir my afronding kort, is in die brandstofverbruikafdeling. Ek het tydens my tyd met die Chery 9,3 l/100 km gehandhaaf. Dit is onaanvaarbaar vir ʼn klein voertuig. Ek het in Desember naby daai syfer gekom met ʼn enorme Land Cruiser.

Op die pad is die vering heel goed. Dalk effens styf, maar nie sleg nie. Die padhouvermoë is aanvaarbaar vir dié klas voertuig, maar die stuur kort ʼn bietjie kalibrasie. Dit is moeilik om die voertuig rustig in ʼn reguit lyn te hou. Hy wandel maklik, en op 0 grade het die stuur nie een of twee grade speling nie – elke inset is ʼn bietjie sensitief. Die stuur is ook te lig as jy rondry; dis amper asof hulle hom die lekkerste vir parkeer gestel het en hom daar gelos het. As hulle hom eerder kalibreer vir 120 km/h toer op die snelweg, sal hy rustiger raak – met ʼn swaarder stuurgevoel.

Die Tiggo spog met ses lugsakke, sluitweerremme, vastrapbeheer en remhulp – alles wat jy van ʼn moderne voertuig verwag. ʼn Pluimpie vir Chery is hul stembeheerstelsel. Dit is beter as wat ek al op enige ander voertuig teëgekom het. ʼn Mens kan sê: “Open my window a bit.” Dan gaan die bestuurder se ruit effens oop. “Open all the windows… Open the sunroof… Tune the radio to 90.5 MHz… Set the temperature to 21 degrees…” en só gaan dit aan. Ek het nie een keer gekry dat die kar my nie verstaan het nie – werklik fantasties.

Dit bring my by die Chery se opsomming. Dit is ʼn indrukwekkende verbetering op die Cherys wat ons in SA ken. Die voertuig bied sterk waarde, maar die segment is taai. Daar is ou name in die B-sportnutssegment, wat nie duurder geprys is nie. Ons weet nog nie hoe betroubaar die nuwe Chery gaan wees nie, en ons sal ook nog nie weet hoe waardevermindering gaan lyk nie; gaan toetsbestuur dus ʼn Tiggo 4 Pro, maar wees versigtig. Tyd sal leer.

Die reeks lyk só:

Die reeks word gedek deur ʼn 5 jaar‑ voertuigwaarborg en 10 jaar‑enjinwaarborg vir die eerste eienaar en ʼn 5 jaar/60 000 km‑diensplan.

Die kompetisie lyk só:

Hier is ʼn magdom mededingers, en nie een wat ek lys, is ʼn slegte voertuig nie. Die Suzuki is ʼn winskoop met onbetwisbare betroubaarheid. Die Duster is fantasties lig op brandstof – en die Citroën ʼn oulike ontwerp. Die Peugeot is bitter mooi – én luuks.