Ford se nuwe Ranger Stormtrak is hier

(Foto: Verskaf)

Dit is vir elke vervaardiger ʼn groot uitdaging om nuwe lewe te blaas in ʼn model wat al amper aan die einde van sy lewensiklus kom.

Ford het groot planne in Suid-Afrika en is reeds besig met ʼn R15,8 miljard-belegging in Silverton. Dit is om gereed te maak vir die volgende Ranger én Amarok. Albei sal hier in Pretoria gebou word.

Ford het die Ranger Thunder ʼn tydjie gelede bekendgestel, en handelaars kon nie voorbly nie. Die Stormtrak is basies presies die Thunder, maar daar is ’n bykomende kleuropsie en nog ’n verandering – iets wat my grootste pyn aanspreek. Die rolluik op die Thunder waarmee ons vir ses maande gery het, was nogal moeilik om oop en toe te maak en oop en toe te sluit. Die Stormtrak se rolluik is elektries met ʼn knoppie in die kajuit om hom oop en toe te maak.

Die huidige Ranger is die beste nog. Nie nét oor sy ontwerp nie, maar mense kan ook die afrondingswerk van die afgelope paar jaar sien en voel. Ford se Sync3-inligtingstelsel met CarPlay en Android Auto werk puik. Dít gepaard met Ford Pass en al sy funksies plaas die Ranger in ʼn liga van sy eie.

Die kajuit se gehalte is uit die boonste rakke. Die sitplekke is uiters gemaklik, en die ergonomie werk puik. Die Ranger is tans die tweede breedste kajuit tussen die dubbelkajuitbakkies, én hy bied goeie beenruimte. Die sitplekke is elektries verstelbaar; ʼn mens is dus vinnig gemaklik. Al item wat ek graag op die volgende Ranger wil sien, is ʼn reikverstelbare stuurkolom.

(Foto: Verskaf)

Ons het met die Stormtrak van Port Elizabeth tot by Stormsriviermond gery. Daarvandaan het ons deur die Baviaanskloof tot in Steytlerville, verby Witmos-ossewakamp en terug tot in Gqeberha (Xhosas met fantastiese vaardighede in tong-kliekery het my al probeer leer hoe om dit uit te spreek, maar ek kry dit net af en toe reg).

Dié reistog was 1 004 km en nagenoeg 650 km daarvan was op grondpaaie. Party mooi, ander nie só mooi nie. Ons was omtrent 10 Rangers, en nie een pap wiel nie. Nie een probleem langs die pad nie, behalwe ʼn klip wat tussen ʼn wiel en die remskyf ingegly het wat ons moes uitkrap.

(Foto: Verskaf)

Dis fantasties – en toe val dit my by. Baie Suid-Afrikaners het bakkies, maar as ons iewers heen toer, vat ons die N1, N2 of N3. Ek het al klomp keer hier gesmeek, vat daai afdraai, ry daai grondpad… jy sal verbaas wees watter juwele daar is om te ontdek. Ligte motreën in die Karoo is een van die belewenisse vir my.

Dit is maklik om die Stormtrak op te som. Dit is inderdaad duur, ja – maar dis ʼn lieflike ryding. Maroela Media gaan vir ses maande met een ry en ek kan nie wag om hom te kry nie.

Die reeks lyk só:

Die reeks word gedek deur ʼn 4 jaar/120 000 km-waarborg en 6 jaar/90 000 km-diensplan.

Ons sal die Stormtrak met sy direkte mededingers vergelyk as ons weer ʼn bietjie tyd met hom deurgebring het.