Foto’s: Op safari met ŉ bakkie en warmlugballon

Ford se bakkies knipoog in die donker vir ons. (Foto: Esté Meyer Jansen/Maroela Media)

Vroue kan net so gemaklik rondry in Ford se taai Stormtrak- en Raptor-bakkies as in die jongste stadsbuksie op die mark.

Dit is juis wat Ford Suid-Afrika onlangs wou bewys met die #TheRangeHerLife-ervaring aan ŉ uitgesoekte groep vrouejoernaliste, webdagboekskrywers en sosialemediabeïnvloeders.

Maar hoe prikkel jy die klomp vroue se belangstelling? Jy nooi hulle natuurlik saam op ŉ warmlugballonrit en vra hulle om die pad na Bill Harrop’s Original Balloon Safaris in Skeerpoort, so 7 km suidwes van Hartbeespoortdam in Noordwes, in Ford se jongste bakkies aan te pak.

So het dit gekom dat ek die gelukkige joernalis van Maroela Media is om 02:30 uit die bed te spring om te midde van donkerte, koue en ŉ goeie skeut beurtkrag die reis mee te maak. Nie ŉ maklike taak vir ŉ naguil nie, maar vir my eerste warmlugballonrit – iets wat al lank op my eie emmerskoplys kuier – doen ek dit net te graag.

ŉ Goeie uur voor die herfssonnetjie nog enigsins ŉ poging aanwend om kop te lig, ry die konvooi deur Sandton se verlate strate, swenk uit vir ŉ paar slaggate en padwerke onderweg na Lanseria en swaai dan die bakkies se neus om die pad na Bill Harrop’s te vind.

Nou kan ek maar bieg, dit is eintlik heerlik om in bakkie te ry. ŉ Mens voel net veiliger, jy het meer van ŉ uitsig en dit voel of die ander motors op die pad skielik ook net meer respek het vir jou.

Boonop is bakkies lankal nie meer net bak met wiele, enjin en sitplekke nie – daar is al die luukse waaraan jy kan dink, terwyl jy ook spasie het en die bakkies met al die nodige veiligheidskenmerke spog.

Semakaleng (Sema) Remofilwe Mathebula is ons land se eerste swart vroulike lugballonvlieënier. (Foto: Esté Meyer Jansen/Maroela Media)

By Bill Harrop’s aangekom het die lugballon halfopgeblaas gelê en wag en in die tussentyd het ons die geleentheid gehad om Semakaleng (Sema) Remofilwe Mathebula, Suid-Afrika se eerste swart vroulike lugballonvlieënier, beter te leer ken.

Mathebula (27) van Ga-Rankuwa, noordwes van Pretoria, het in November 2021 haar eerste solo-toetsvlug geslaag en gaan waarskynlik later vanjaar Suid-Afrika internasionaal verteenwoordig by die Wêreld Warmlugballonkampioenskap in Slowenië.

Benewens die feit dat Mathebula ŉ lugballonvlieënier is, is sy ook ŉ ontleder van regeringsake by Ford Suid-Afrika. Sy staan dikwels om 03:00 in die oggend op om met een van die warmlugballonne te gaan vlieg en keer dan terug kantoor toe om ŉ dag se werk aan te pak.

As jy tyd saam met dié inspirerende, geesdriftige vrou in ŉ lugballon se mandjie spandeer het, en die vreedsaamheid van die geruislose vlug ervaar, verstaan jy waarom sy lag-lag die donkeroggend hiervoor aandurf.

Om die son so oor Harties te sien opkom terwyl jy saam in die lug rond dryf met die wind wat jou ŉ bietjie rigting gee, is iets wat ŉ mens nie maklik in woorde kan omskryf nie.

Ná ŉ uur se onbeskryflike genot land ons in die middel van niks en nêrens, veilig op ŉ waentjie in die veld. Die vlug van 60 minute het eenvoudig net te gou verby gevlieg. Ons drink sjampanje – alkoholvry natuurlik want ons gaan binnekort weer self moet ry.

Terug op die aarde geniet ons eers alkoholvrye vonkelwyn om die rit te vier. (Foto: Esté Meyer Jansen/Maroela Media)

Volgens Marc Nuthull, ons vlieënier van die dag, is dit glo ŉ tradisie van lugballonvlieëniers van ouds om met ŉ bottel sjampanje te vlieg wat hulle as karmenaadjie vir die eienaar van die grond kan aanbied; glo om te bewys die mense wat wel nou sy land toegesak het, is nie vreemde wesens van die ruimte nie.

Nuthull spog reeds met meer as 1 600 vlugure in ŉ warmlugballon en was ook die wenner van die 2021 plaaslike lugballonkampioenskap.

Ná ŉ heerlike ontbyt spring ons terug in ons Ford Stormtrak en Raptor-bakkies om hulle deur ŉ paar passies by die ADA opleiding-en-buitelugsentrum te vat. Glo dit of jy nou wil of nie, hierdie gedeelte het my behoorlik op my senuwees gehad – ek het met my vorige viertrekopleidingsessie as groentjie joernalis, toe ook by Ford, die spoor byster geraak en is tot groot vreugde van die ouer manne bakkie en al uitgetrek.

Ons is egter mooi gewys wat om aan en af te skakel en die Ford het die koppie basies self uitgeklim.

Hier het nog ŉ heerlik verrassing op die span gewag. Ons is bederf met ŉ noenmaaltee wat die koningin sou beïndruk het – net daar op die koppie onder ŉ doringboom met nóg ŉ asemrowende uitsig oor die Magaliesberg-omgewing.

Met die rit terug na Sandton was al die vroue dit eens – groot bakkies is beslis lankal nie meer net speelgoed vir die manne nie.

Die groep vroue wat saam op safari gegaan het. (Foto verskaf)

Lees Maroela Media se artikels oor die Ford Stormtrak hier en hier.
Lees Maroela Media se artikel oor die Ford Raptor hier.
Besoek Ford Suid-Afrika se webwerf vir meer inligting oor die Stormtrak en Raptor se kenmerke en prys.
Besoek Bill Harrop’s Original Balloon se webwerf om ŉ rit in ŉ warmlugballon te bespreek – dit is beslis iets wat almal een keer moet ervaar.