Goedkoop nie altyd duurkoop

Wanneer dit by motors kom, sal ek mense meestal afraai om vir die goedkoper weergawe te gaan weens verskeie slaggate soos ’n swakker diensplan of betroubaarheid wat nie heeltemal kan kers vashou by mededingers nie.

Maar wat as jy die vorige weergawe van die presiese bakkie kan kry vir ʼn baie beter prys? Die bakkie waarvan ek praat, is Toyota se Hilux. Toyota het ʼn geruime tyd terug die 2.8 Raider en 2.4 SRX in Suid-Afrika bekendgestel. Daar was aanvanklik ontsteltenis omdat Suid-Afrika nie die bakkie met die mooier ligte en sierrooster kry wat in Australië beskikbaar is nie, en ook nie CarPlay en Android Auto nie.

Toyota het laat verlede jaar hul reeks opgeknap. Die luuksste model in die reeks was altyd die Raider. Die SRX was die intreemodel. Toyota sê die mark het gepraat – en hulle het geluister. Die SRX se spesifikasievlak is effens gelig en staan nou bekend as die Raider. Die Raider se spesifikasievlak is heelwat opgeskerp en staan nou bekend as die Legend.

Nietemin, meer oor die Raider. ʼn Dubbelkajuitbakkie is gereeld ietwat van ʼn penarie. ʼn Mens wil ʼn lekker sterk bakkie hê om mee te ry, maar jy wil terselfdertyd nie met daai einste luukse lorrie werk nie uit vrees vir skade. Aan die ander kant, vir werksdoeleindes wil jy darem van die luukshede hê, maar nie oortollige goed teen ʼn plaas se prys nie. Ek dink die Toyota Hilux 2.4 Raider vind die goue middeweg.

Die ontwerp is netjies, mooi opgekikker teenoor die SRX. Binne is dit heeltemal voldoende, met spoedkontrole en CarPlay en Android Auto by. Alles wat jy nodig het om lekker met jou lorrie te kan werk.

Onder die kap is daar ʼn heeltemal sterk genoeg 2.4 GD-6-viersilinderturbodieselenjin met 110 kW en 400 Nm. ʼn Mens kan dan besluit of jy ʼn handrat of outo, 4×4 of 4×2, wil hê. Party mense sal met my stry dat die 2.4 nie sterk genoeg is nie, maar ek stem geensins saam nie. Die 4×2-weergawes van die 2.4 kan 2 750 kg sleep, en die 4×4-weergawes presies dieselfde as die 2.8 teen 3 500 kg.

ʼn Ander voordeel van die 2.4 is, as jy nie soos ʼn nar ry nie, dat hy werklik lig op brandstof is. ʼn Pel het die vorige 2.4 GD-6 SRX-handrat… ʼn enkelkajuit. Sy beste verbruik wat hy al gehaal het, is 6,2 ℓ/100 km. Dit is voorwaar fantasties vir ʼn bakkie.

Op die pad is die Raider pure Hilux. Lekker sterk en rateltaai. Ja,  dit bly ʼn bakkie en is ʼn bietjie stamperig as hy leeg is, maar laai net iets op, dan ry hy soos ʼn droom. Dit is geen geheim dat ek ʼn groot Hilux-liefhebber is nie. Die 2.4 Raider versterk net die Hilux-aanbieding in my opinie.

Die reeks lyk só:

Toyota Hilux 2.7 S122 kW/245 Nm10,7 ℓ/100 kmR449 200
Toyota Hilux 2.4GD-6 SR110 kW/400 Nm7,1 ℓ/100 kmR486 400
Toyota Hilux 2.4GD-6 Raider110 kW/400 Nm7,1 ℓ/100 kmR515 300
Toyota Hilux 2.4GD-6 Raider outo110 kW/400 Nm7,3 ℓ/100 kmR531 600
Toyota Hilux 2.4GD-6 4×4 SR110 kW/400 Nm7,6 ℓ/100 kmR560 200
Toyota Hilux 2.4GD-6 Raider 4×4110 kW/400 Nm7,6 ℓ/100 kmR595 400
Toyota Hilux 2.4GD-6 Raider 4×4 outo110 kW/400 Nm7,7 ℓ/100 kmR621 700
Toyota Hilux 2.8GD-6 Raider outo150 kW/500 Nm7,4 ℓ/100 kmR644 500
Toyota Hilux 2.8GD-6 Legend150 kW/420 Nm7,4 ℓ/100 kmR681 900
Toyota Hilux 2.8GD-6 Legend outo150 kW/500 Nm7,4 ℓ/100 kmR710 100
Toyota Hilux 2.8GD-6 Raider 4×4 outo150 kW/500 Nm8 ℓ/100 kmR720 500
Toyota Hilux 2.8GD-6 Legend 4×4150 kW/420 Nm7,9 ℓ/100 kmR748 200
Toyota Hilux 4.0 V6 Legend 4×4175 kW/376 Nm11,8 ℓ/100 kmR780 500
Toyota Hilux 2.8GD-6 Legend 4×4 outo150 kW/500 Nm8 ℓ/100 kmR780 900
Toyota Hilux 2.8GD-6 Legend 4×4 RS150 kW/500 Nm7,9 ℓ/100 kmR835 400
Toyota Hilux 2.8GD-6 Legend 4×4 outo RS150 kW/500 Nm8 ℓ/100 kmR868 100

Die reeks word gedek deur ʼn 3 jaar/100 000 km-waarborg en 9-dienste-diensplan.

Die kompetisie lyk só:

Ford Ranger 2.2 XL Sport 4×4 handrat dubbelkajuit118 kW/385 Nm7,2 ℓ/100 km4 jaar/120 000 km-waarborg

6 jaar/90 000 km-diensplan

R551 300
Isuzu KB250 X-Rider 4×4 handrat dubbelkajuit100 kW/320 Nm7,9 ℓ/ 00 km5 jaar/120 000 km-waarborg

5 jaar/90 000 km-diensplan

R565 200

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

5 Kommentare

jongste oudste gewildste
Willem

Ek wil ook een hê, dankie

Pot se lepel

Daar doen Toyota dit alweer….

Loop staan en plak n Ford Ranger sierrooster op n Hilux vas.

Die ooreenkomste is net te duidelik om nie raak te sien nie.

Wielspore

Die benaming Raider en 2.4 laat menigte Suid Afrikaners regop sit en luister want dit is ‘n kombinasie wat bekend is vir betroubaarheid en kwaliteit. Toyota weet dit en voed nou die verbruiker se brein met die mooi kombinasie teen ‘n goeie prys. Na my mening is Toyota SA tans besig met die bekendstelling van verskeie nuwe modelle en is besig om nog ‘n groter gedeelte van die voertuig mark op te slurp. Ek het onlangs gaan kyk na die nuwe Urban Cruiser en dit is ‘n goeie produk en gaan plek vat by een of ander vervaardiger. Met goeie… Lees meer »