Hyundai is al ʼn geruime tyd ʼn sterk speler wanneer dit kom by billike buksies. Hyundai het al derduisende Atos-karretjies verkoop en toe kom hul fantastiese opvolger in die vorm van die Hyundai Grand i10. Dit was ʼn puik produk wat goed geprys was, mooi gestileer was en bitter gemaklik gery het.
Hyundai het ons effens verwar toe die Atos-naam terugkom, maar dit is nou hul intreebuksie en dan kom die nuwe Grand i10. Hy’t effens grootgeword.
Die Grand i10 word steeds deur twee enjins aangedryf – Hyundai se 1.0-driesilinder en 1.2-viersilinder- atmosferiese enjins. Daar is ʼn 5-spoed-handrat of 4-spoed-outo beskikbaar… so die reeks dek die grootste deel van die intree-segment. Die 1.2 wat ons getoets het, trek voorwaar goed met 61 kW en 114 Nm. Dít gepaard met ʼn ligte koppelaar en gladde ratwisselaksie verseker dat die Grand i10 ʼn lekker buksie is om die verkeer mee aan te durf.
Ek is egter nie oortuig dat hy mooier is as sy voorganger nie en die pogings om die Grand i10 nog grênder te maak, sit vir my die pot effens mis. Die paneelbord se ontwerp is ʼn bietjie vreemd en die kunsleer op die sitplekke word ongelooflik warm. As die tjor ʼn rukkie in die son gestaan het, voel dit jou boude gaan afsmelt as jy inklim. Ek voel dat ʼn goeie gehalte bekleedsel beslis beter sou werk as die kunsleer.
Op die pad toer die Grand i10 heel lekker. Die ritgehalte is soepel genoeg om gemaklik te wees, en styf genoeg om billike padhouvermoë te bied. Aan die veiligheidskant bied die Hyundai twee lugsakke en ABS met remkragverspreiding. Dit is wel Hyundai se uitstekende waarborg wat verdere gemoedsrus bied.
Dit is maklik om die Grand i10 op te som. Dit is moontlik ʼn oulike opsie, maar die kompetisie in dié segment is rateltaai. Teen die 1.2 Fluid se prys kan jy groter buksies soos Ford se Figo en VW se Polo Vivo bekom, en dit is ʼn groot probleem vir die Grand i10.
Die reeks lyk só:
Hyundai Grand i10 1.0 Motion-handrat | 49 kW/94 Nm | 5,4 ℓ/100 km | R193 900 |
Hyundai Grand i10 1.0 Motion Cargo-paneelwa | 49 kW/94 Nm | 5,4 ℓ/100 km | R196 500 |
Hyundai Grand i10 1.0 Motion-outo | 49 kW/94 Nm | 5,9 ℓ/100 km | R218 900 |
Hyundai Grand i10 1.0 Fluid-handrat | 49 kW/94 Nm | 5,4 ℓ/100 km | R218 900 |
Hyundai Grand i10 1.2 Fluid-handrat | 61 kW/114 Nm | 5,9 ℓ/100 km | R233 500 |
Hyundai Grand i10 1.2 Fluid Cargo-paneelwa | 61 kW/114 Nm | 5,9 ℓ/100 km | R234 900 |
Hyundai Grand i10 1.2 Fluid-outo | 61 kW/114 Nm | 6,9 ℓ/100 km | R259 500 |
Die reeks word gedek deur Hyundai se 5 jaar/150 000 km-voertuigwaarborg en 7 jaar/200 000 km-dryfstelselwaarborg en 1 jaar/15 000 km-diensplan.
Die kompetisie lyk só:
Fiat 500 TwinAir Pop | 63 kW/145 Nm | 3,8 ℓ/100 km | 7 lugsakke | 3 jaar/100 000 km-waarborg 3 jaar/100 000 km-diensplan | R205 900 |
Ford Figo 1.5 Ambiente | 88 kW/150 Nm | 5,7 ℓ/100 km | 2 lugsakke | 4 jaar/120 000 km-waarborg 4 jaar/60 000 km-diensplan | R215 100 |
Suzuki Ignis 1.2 GLX | 61 kW/113 Nm | 5,1 ℓ/100 km | 2 lugsakke | 5 jaar/200 000 km-waarborg 2 jaar/30 000 km-diensplan | R223 900 |
Volkswagen Polo Vivo 1.4 Comfortline | 63 kW/132 Nm | 5,9 ℓ/100 km | 2 lugsakke | 3 jaar/120 000 km-waarborg Geen diensplan | R233 200 |
Kia Picanto 1.2 X-Line | 61 kW/122 Nm | 5 ℓ/100 km | 2 lugsakke | 5 jaar/onbeperkte km-waarborg 2 jaar/30 000 km-diensplan | R237 995 |
Honda Jazz 1.2 Trend | 66 kW/110 Nm | 5,6 ℓ/ 100 km | 6 lugsakke | 5 jaar/200 000 km-waarborg Geen diensplan | R245 600 |
Tussen dié mededingers, indien spasie nie van kardinale belang is nie, is die Fiat 500 puik waarde. Die Ford Figo 1.5 se enjin is die beste, en boonop teen ʼn puik prys. Die Picanto X-Line is ʼn mooier buksie, wat lekkerder ry en teen dieselfde prys. Maak ʼn kortlys en gaan toetsbestuur almal.
Hi Brendon ,sou die Suzuki Swift GLX nie beter as mededinger inpas nie ?