Koelste bakkie nóg?

Suid-Afrikaners is mal oor bakkies en as jy nou die knuppel in die hoenderhok wil gooi moet jy die Ford vs. Toyota-debat aan die gang kry.

Daar is ʼn paar kategorieë – klein halftonbakkies soos Nissan se NP200, werkesels, langasafstandbakkies, 4×4 of 4×2, lekker leefstyldubbelkajuitbakkies en dan is daar ʼn klein kategorie gespesialiseerde bakkies. Tot nou was daar net die Cruiser en Raptor in dié klas. Die Raptor sorg vir die jaagduiwels, en die Cruiser vir die oorlandontdekkingsreisigers waar absolute betroubaarheid nodig is.

Toe kom Jeep met sy Gladiator. Dink aan ʼn Jeep Wrangler Rubicon Unlimited, met ʼn bak agter aan. Ek sal nou nie lieg nie – die proporsies is effens vreemd van sekere hoeke. Hy is baie lank maar dit is onmiskenbaar ʼn Jeep.

Die binneruim is pure Wrangler net ʼn bietjie meer ruimte. Die Gladiator is die gemaklikste Wrangler waarin ek al gery het, nie net in terme van spasie nie, maar ritgehalte ook. Daar is gemaklike sitplekke, ʼn duursame paneelbord met klimaatbeheer en ʼn lekker groot raakskerm wat Android Auto en Apple CarPlay bied. Die klankstelsel is lekker sterk. Onder die agtersitplekke is oulike stoorplekke wat kan sluit. Die gereedskap waarmee ʼn mens die dak en deure afhaal word daarin gebêre en daar is ʼn Bluetooth-luidspreker wat uitgehaal kan word vir ʼn bietjie musiek langs die kampvuur.

Onder die kap, wat steeds met twee slotjies oopmaak, sit Jeep se uiters gewilde 3,6 V6 Pentastar-enjin. Hy bied 209 kW en 347 Nm. Die enjin is gepaard aan ʼn puik 8-spoed wringkragomsitter outomatiese ratkas en dít is hoekom die nuwe Jeep baie beter is by die brandstofpomp is as die Wranglers van ouds.

Die Gladiator spog met goeie ritgehalte, gedeeltelik te danke aan die lang asafstand en tweedens die kronkelvere agter en die Fox-skokbrekers. Daai manne weet hoe om skokbrekers te vervaardig.

Die Gladiator is Trail Rated. ʼn Trail Rated Jeep het 4×4-vernuf wat meeste mededingers lag-lag uitstof. Die Gladiator wat ons hier in Suid-Afrika kry, het nie nét die Rubicon-suite 4×4-speelgoed nie, maar die dak en deure kan afhaal en daar is twee sulke spore in die bak wat wys waar jou motorfiets moet staan. Deel van die standaardtoerusting is swaardiens rotsglystawe én 32” BF Goodrich-bande. Dit is eenvoudig ʼn koel ryding wat geen verskonings maak oor wie en presies wat hy is nie. Hy kan ook 2,7 ton sleep!

Ek hoor baie mense mor oor die prys maar in dié kategorie, is dit wat dié tipe speelgoed kos en vir die wat die geld het gaan eenvoudig nie twee keer dink nie. Die moeilikste besluit gaan wees om die kleur te kies en watter speelgoed ingesluit moet wees. Ek soek die dowwe grys een, asseblief.

Die Gladiator lyk só:

Ons sal weer tyd met die Gladiator deurbring en sien hoe maklik dit is om met hom in die daaglikse roetine saam te leef. Ons wil ook beslis met hom karavaan sleep! Ons sal ná die volgende ontmoeting die Gladiator met sy mededingers vergelyk.