Krag is nie alles

Ek weet nie waar dit vandaan kom nie, maar luuksheid en krag loop gewoonlik hand aan hand in ʼn voertuig. Die luuksste motors is gewoonlik met ʼn lieflike, groot vuurvretende enjin toegerus. Ek kan egter aan een spesifieke voertuig uit my kinderjare dink wat ʼn pragtige voertuig was en soos ʼn pantserwa gebou was en tog nie ʼn allemintige V8-enjin gehad het nie – dit was Mercedes-Benz se W124 reeks 230E.

Jaguar het onlangs ʼn F-Pace by my afgelaai. Ek sien D200 agterop en dink by myself: “Sjoe, ʼn tweeliterdiesel, vir dié kat!?” Dit het my egter vinnig opgeval dat dié F-Pace steeds ʼn R-Dynamic HSE is. Elke moontlike luuksheid is in die kajuit ingeprop. Pragtige leer, panoramiese sondak, elektries verstelbare sitplekke wat kan warm of koud én masseer. Al die belangrikste inligting word op die voorruit geprojekteer en die nuwe geboë raakskerm is pragtig.

Die redelike hoë skouerlyn agter voel aanvanklik vreemd as jy agter sit. Die venster is baie hoog, maar ʼn mens raak dit vinnig gewoond en dan voel jy veilig, asof jy in ʼn kokonnetjie toegevou is. Aanvanklik lyk die kattebak effens klein, maar die oomblik wat jy besef daar rus ʼn volgrootte spaarwiel onder daai vloer, dan vergewe jy Jaguar dit.

Onder die kap sit ʼn doodgewone 2.0‑viersilinderturbodieselenjin as ʼn mens Jaguar se Ingenium-enjins gewoon kan noem. Hy bied 150 kW en 430 Nm. Die enjin stoot die krag aan al vier wiele deur ʼn 8-spoed‑wringkragomsitter‑ outomatiese ratkas. Van 0 tot 100 km/h vat net agt sekondes en hy kan 210 km/h voluit hol. Jaguar se beweerde brandstofverbruik van 5,2 ℓ/100 km om die gekombineerde siklus, is net so indrukwekkend hoewel ons 7,8 ℓ/100 km tydens ons toets gehandhaaf het.

Op die pad wys die F-Pace sy staal. Dit is ʼn redelike groot sportnutsvoertuig, maar agter die stuur voel dit meer soos ’n sportmotor as ʼn lomp sportnuts. Dan vat mens die langpad en besef waaroor die F-Pace gaan. Dit is ʼn über luukse langpadgenoot. Hy toer lieflik stil en hoewel sy vering nie sag is nie, is sy skokbrekers goed gekalibreer om die stampe en stote plat te stryk. Die effe stywer vering bied weer puik padhouvermoë.

Die Jag beskik oor ʼn baie sterk spesifikasievlak. Daar is ses lugsakke, sluitweerremme met elektroniese remkragverspreiding, vastrap en stabiliteitsbeheer – alles aan die passiewe kant. Tussen die aktiewe stelsels is daar blindekolwaarskuwing, baanbeheer, wegtrekhulp en botsingwaarskuwing met noodremhulp.

Ek het aanvanklik gesukkel om vatplek aan die Jag te kry. Dit is darem baie geld vir ʼn tweeliter. Toe val dit my by – ʼn enorme V8 is nie almal se smaak nie, veral met vandag se skrikwekkende brandstofpryse. Dié prysklas is nie vir almal beskore nie, maar indien jy in die mark is vir só tipe ryding gaan kyk gerus.

Die reeks lyk só:

Jaguar F-Pace D200 AWD S150 kW/430 Nm5,2 ℓ/100 kmR1 164 618
Jaguar F-Pace D200 AWD R-Dynamic SE150 kW/430 Nm5,2 ℓ/100 kmR1 234 618
Jaguar F-Pace P250 AWD S184 kW/365 Nm7,3 ℓ/100 kmR1 261 940
Jaguar F-Pace D300 AWD S221 kW/650 Nm6,9 ℓ/100 kmR1 282 344
Jaguar F-Pace D200 AWD R-Dynamic HSE150 kW/430 Nm5,2 ℓ/100 kmR1 321 418
Jaguar F-Pace P250 AWD R-Dynamic SE184 kW/365 Nm7,3 ℓ/100 kmR1 331 940
Jaguar F-Pace D300 AWD R-Dynamic SE221 kW/650 Nm6,9 ℓ/100 kmR1 352 144
Jaguar F-Pace P250 AWD R-Dynamic HSE184 kW/365 Nm7,3 ℓ/100 kmR1 418 740
Jaguar F-Pace D300 AWD R-Dynamic HSE221 kW/650 Nm6,9 ℓ/100 kmR1 436 644
Jaguar F-Pace P400e AWD S297 kW/640 Nm2,4 ℓ/100 kmR1 658 400
Jaguar F-Pace P400e AWD R-Dynamic SE297 kW/640 Nm2,4 ℓ/100 kmR1 722 900
Jaguar F-Pace P400e AWD R-Dynamic HSE297 kW/640 Nm2,4 ℓ/100 kmR1 795 400
Jaguar F-Pace SVR405 kW/700 Nm12,2 ℓ/100 kmR1 915 226

Die reeks word gedek deur ʼn vyf jaar/100 000 km-waarborg en omvattende instandhoudingsplan.

Die kompetisie lyk só:

Volvo XC60 B5 AWD Inscription183 kW/350 Nm7,3 ℓ/100 km5 jaar/100 000 km‑waarborg en omvattende instandhoudingsplanR944 598
Porsche Macan185 kW/400 Nm8,8 ℓ/100 km2 jaar/onbeperkte km‑waarborg

3 jaar/100 000 km‑ omvattende instandhoudingsplan

R1 050 000
Mercedes-Benz GLC220d Coupé 4Matic AMG Line143 kW/400 Nm5,5 ℓ/100 km2 jaar/onbeperkte km‑waarborg

5 jaar/100 000 km‑ omvattende instandhoudingsplan

R1 107 142
BMW X4 xDrive 20d M Sport140 kW/400 Nm5,6 ℓ/100 km2 jaar/onbeperkte km‑waarborg

5 jaar/100 000 km‑ omvattende instandhoudingsplan

R1 137 176
Alfa Romeo Stelvio 2.0T Super Q4206 kW/400 Nm7 ℓ/100 km5 jaar/100 000 km‑waarborg en omvattende instandhoudingsplanR1 188 900
Lexus RX350 F Sport221 kW/370 Nm9,6 ℓ/100 km7 jaar/105 000 km‑waarborg en omvattende instandhoudingsplanR1 284 500

Hier is ʼn klomp mededingers. Die F-Pace is meer soos ʼn koepee gestileer, soos die X4 en GLC Coupé, en hy pas tussen ʼn C- en D-segment­‑sportnuts – so die Porsche Macan is effens kleiner as die F-Pace, maar bied dieselfde vyf sitplekke en ʼn beter kattebak. Tussen dié mededingers is dit waarskynlik die Porsche Macan of Lexus RX vir my – maar die Jag is ʼn pragtige voertuig; gaan toetsbestuur hom gerus.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

2 Kommentare

jongste oudste gewildste
VaalDonkie

‘n Klomp wringkrag laag in die toere af is baie lekker in ‘n luukse motor. Dit beteken jy hoef minder werk te doen om aan die gang te kom en dit laat jou ontspan. My kar het omtrent dieselfde wringkrag as hierdie kar en dis so lekker om net voet neer te sit as jy iemand wil verbysteek sonder om bekommerd te wees oor of jy vinning genoeg kan spoed optel. Ek het gewoonlik nie eens nodig om uit 5de terug 4de toe te gaan nie. Dis vir my ook deel van “luuks”.

JohanR

Wed jou daar is ‘n minister wat so kyk en lees, en jammer voel hy of sy se R700000 val soe bietjie kort! Maar die Jag is LEKKER!