Maroela Motors toetsbestuur die Peugeot 208 GT-Line Outo.
Peugeot is ʼn naam wat ek as ʼn laaitie kan onthou. My pa en oom het vir my probeer verduidelik dat ʼn Peugeot 504 ʼn fantastiese motor was. My sewejarige brein kon dit nie verwerk nie. Die 504 was oud en baie lelik, ten spyte van die feit dat dit moontlik sterker as ʼn tenk was. Nou dat ek al klein bietjie ouer is en te danke aan die wêreldwye web is ek darem bitter spyt dat ons nooit die Peugeot 205 GTi hier in Suid-Afrika gekry het nie.
In die tagtigerjare is die Hot Hatch ontwerp. Volkswagen het hulle Golf GTi bekendgestel, Peugeot hulle 205 GTi, Opel die Kadett GTE, Ford sy Escort XR3, Renault die 5 GT Turbo, en ʼn paar ander. Hier was ʼn klein buksie waarin al die kindertjies kon pas – en pappa kon dit net soveel geniet. Nietemin, ons het weens sanksies hier in Suid-Afrika baie min van hierdie blitsbuksies gekry.
Ek is baie dankbaar dat dit nou 2016 is, en ons het ʼn groter verskeidenheid van modelle om van te kies as ooit tevore in Suid-Afrika. Een van hulle is die louwarm 208 GT-Line outo. Tipies Peugeot met hulle eie ontwerpstyl. Mooi lyne en sportiewe intensies van buite en ʼn ergonomies verpakte kajuit is aan die orde van die dag met die 208.
Ons toetsmotor het in ʼn vreemde tekstuurverf by ons kantoor opgedaag en ek kan nie vir jou sê hoeveel mense het aan die motor gevryf in die week wat die 208 by ons gekuier het nie. Aanvanklik lyk dit soos ʼn vinieloortreksel – maar dit is wel regte egte verf. Ek kan nie besluit of ek daarvan hou of nie – maar gelukkig is hy nie net in hierdie tekstuur of kleur beskikbaar nie, so elkeen kan maar vir homself besluit.
Die binneruim is baie meer ruim as wat die voertuig se proporsies jou sal laat dink. Die sportsitplekke is lekker gemaklik en hou mens lekker styf vas. Die stuurwiel op die 208 is komieklik klein en bietjie bo en onder plat gemaak. Mens raak dit dadelik gewoond – en as die stuurwiel enigsins groter was sou mens nie die instrumente kon lees wat hoog op die paneelbord gemonteer is nie. Alle kontroles is binne reikafstand en mens raak al die kontroles maklik baas. Met my sitplek gemaklik gestel, is daar indrukwekkende beenruimte agter en ʼn billike kattebak.
Die enjin- en ratkaskombinasie werk heel goed. Peugeot se EAT6 (Efficient Automatic Transmission) ratkas is ʼn dubbelkoppelaar-tipe ratkas maar gebruik wel ʼn wringkragomsitter. Die teenwoordigheid van ʼn wringkragomsitter verseker dat stadsverkeer nie die ratkas onkant vang soos in baie ander dubbelkoppelaar-tipe ratkaste nie. Die 1.2 liter drie-silinder turbo petrolenjin trek lekker sterk, veral omdat die wringkrag van baie lae toere af beskikbaar is. Die 81kW en 205Nm wringkrag in 1 150 kg laat hierdie buksie hol: 0 – 100 km/h duik op in 9,8 sekondes en hy sal aanhou hol tot 190 km/h. Peugeot beweer die gemiddelde brandstofverbruik van 4,5 l/100 km is moontlik met die 208 GT-Line outo. My voet was moontlik net te swaar – maar ons het 7,2 l/100 km gehandhaaf.
Die vering en hantering is gemaklik maar terselfdertyd is die vering hard genoeg dat mens draaie met entoesiasme kan benader. Die breë 17 duim-bande maak ook seker die 208 plak lekker vas op die pad.
Om op te som: die 208 GT-Line outo is ʼn gerieflike motor. Hy is aantreklik en goed aanmekaar gesit. Die kajuit is gemaklik en die enjin hou daarvan om met woema te ry. Die outokas maak verkeer ʼn plesier en spoedbeheer hou mens uit die moeilikheid op die langpad. R304 900 is styf en skrams duurder as sy mededingers.
Die reeks lyk so:
208 Pop Art | 50kW/ 95Nm | 4,4 l/100 km | R169 900 |
208 1.2 Active | 60kW/ 118Nm | 4,3 l/100 km | R224 900 |
208 GT-Line | 81kW/ 205Nm | 4,5 l/100 km | R284 900 |
208 GT-Line outo | 81kW/ 205Nm | 4,5 l/100 km | R304 900 |
Die 208 reeks word gedek deur ʼn 3 jaar/45 000 km-diensplan, en ʼn 3 jaar/100 000 km-waarborg.
Die kompetisie lyk so:
Audi A1 1.4TFSI SE Outo | 92kW/ 200Nm | 4,9 l/100 km | 5 jaar/100 000 km- instandhoudingsplan 1 jaar/onbeperkte km waarborg | R352 500 |
Citroën DS3 88kW Style Outo | 88kW/ 160Nm | 6,6 l/100 km | 4 jaar/60 000 km-diensplan 3 jaar/100 000 km-waarborg | R328 400 |
Mazda 2 1.5DE Hazumi Outo | 77kW/ 220Nm | 4,4 l/100 km | 3 jaar/onbeperkte km-diensplan 3 jaar/onbeperkte km waarborg | R291 700 |
Ford Fiesta 1.0T Titanium outo | 74kW/ 170Nm | 4,9 l/100 km | 5 jaar/60 000 km-diensplan 4 jaar/120 000 km-waarborg | R269 900 |
Volkswagen Polo 1.2 TSI Highline Outo | 81kW/ 175Nm | 5,1 l/100 km | 3 jaar/45 000 km-diensplan 3 jaar/120 000 km-waarborg | R285 400 |