Luuksheid en weelde. Dit is die eerste twee woorde wat by opkom om Mercedes-Benz se E220d AMG Line-weergawe te beskryf.
Spasie, gerief, veiligheid en tegnologie is die ander woorde. Daar is sedert 1946 meer as 14 miljoen van Mercedes se E-klas van die hand gesit en dit is steeds sy topverkoper-model in die passasiersmotorreeks.
Ongelukkig is die moderne verbruiker gaande oor ʼn sportnutsvoertuig – en behep met hoër sit. As ʼn mens eers ʼn luukse groot sedanmotor ervaar het – dan steek ʼn sportnuts erg af… veral as ʼn mens nie sleep nie en die goeie teer van die N3 tussen Gauteng en Natal gaan trotseer.
Vir die langpad see toe kan ʼn mens nie vir ʼn beter reisgenoot as die E220d vra nie. Die uiters gemaklike taankleurige Nappa-leer-sitplekke gee ʼn weelderige gevoel aan die groot binneruim wat volgeprop is met bondels tegnologie.
Danksy ʼn magdom raak-kontroles op die stuurwiel kan die bestuurder vinnig en maklik verskeie funksies uitvoer deur skaars ʼn vinger te lig.
Danksy die E220d se lekker groot kattebak kon ons alles wat ons wou vir die week lange seevakansie inpak – daar was selfs genoeg plek vir al baba se speelgoed en benodighede. Nóg ʼn rede hoekom ʼn sedanmotor partykeer ʼn beter oplossing is as ʼn sportnutsvoertuig is eenvoudig die kattebak. Die E-klas se kattebak is 540 liter. Die GLE, Merc se sportnutsvoertuig, sʼn is 630 liter maar dit is egter tot teen die dak, en mens kan nie altyd só laai nie. Ek voel dus dat die sedanmotor se kattebak meer bruikbaar is as die sportnutsvoertuig sʼn.
Die Merc ry uiters gemaklik en dit is maklik om by tye te vergeet jy is in ʼn motor. Die ritgehalte is regtig goed en daar is genoeg krag om vinnig verby te steek of om die bulte te laat les opsê.
Die E220d spog met 143 kW en 400 Nm en 0 tot 100 km/h vat net 7,4 sekondes en hy sal aanhou snel tot op 235 km/h. Mercedes beweer 4,7 ℓ/100 km en op die lang oop pad is dit beslis haalbaar.
Aan die buitekant gee meer chroom, die “A-vormige” diamant-sierrooster, ʼn nuwe buffer, gesplete agterligte en ʼn nuwe bagasieruim-vorm, die E220d ‘n sportiewe voorkoms. Die groot digitale skerms, die jongste geslag MBUX-multimediastelsel met stembeheer, ʼn middelkonsole waar jy ook ʼn magdom funksies kan beheer en die AMG- vlekvrye staal-pedale, deurpanele en swart vloermatte voltooi die sportiewe voorkoms in die binneruim.
Kameras rondom die motor gee jou ʼn beeld van bo af as jy moet parkeer en op die oop pad is daar ook ʼn magdom veiligheidstelsels, soos die motor se spoed wat outomaties verminder word wanneer ʼn verkeersopeenhoping gewaar word en die bestuurder nie vinnig genoeg reageer nie.
Die luuksheid en krag kom egter teen ʼn prys – vanaf R984 000. Die enigste ander negatiewe punt is dat wanneer jy eers só motor gery het, anders alles middelmatig voel.
Die reeks lyk só:
Mercedes-Benz E200 sedan Avantgarde | 145 kW/ 320 Nm | 7 ℓ/ 100 km | R927 680 |
Mercedes-Benz E220d sedan Avantgarde | 143 kW/ 400 Nm | 5,2 ℓ/ 100 km | R984 000 |
Mercedes-Benz E200 sedan AMG Line | 145 kW/ 320 Nm | 7 ℓ/ 100 km | R993 980 |
Mercedes-Benz E200 koepee AMG Line | 145 kW/ 320 Nm | 7,2 ℓ/ 100 km | R1 044 040 |
Mercedes-Benz E220d sedan AMG Line | 143 kW/ 400 Nm | 5,2 ℓ/ 100 km | R1 054 500 |
Mercedes-Benz E300 koepee AMG Line | 190 kW/ 370 Nm | 7,3 ℓ/ 100 km | R1 139 280 |
Mercedes-Benz E200 afslaandak AMG Line | 145 kW/ 320 Nm | 7,4 ℓ/ 100 km | R1 172 640 |
Mercedes-Benz E300 afslaandak AMG Line | 190 kW/ 370 Nm | 7,4 ℓ/ 100 km | R1 268 000 |
Mercedes-AMG E53 4MATIC+ koepee | 320 kW/ 520 Nm | 8,8 ℓ/ 100 km | R1 630 600 |
Mercedes-AMG E53 4MATIC+ afslaandak | 320 kW/ 520 Nm | 8,9 ℓ/ 100 km | R1 768 960 |
Mercedes-AMG E63 S 4MATIC+ sedan | 450 kW/ 850 Nm | 11,6 ℓ/ 100 km | R2 436 440 |
Die reeks word gedek deur ʼn 2 jaar/ onbeperkte km waarborg en 5 jaar/ 100 000 km omvattende instandhoudingsplan.
Die kompetisie lyk só:
Volvo S90 D4 R-Design | 140 kW/ 400 Nm | 4,4 ℓ/ 100 km | 5 jaar/ 100 000 km waarborg en omvattende instandhoudingsplan | R918 200 |
Audi A6 40TDI sports S line | 140 kW/ 400 Nm | 5,2 ℓ/ 100 km | 1 jaar/ onbeperkte km waarborg 5 jaar/ 100 000 km omvattende instandhoudingsplan | R960 500 |
Lexus ES 300h SE | 160 kW/ 221 Nm | 4,6 ℓ/ 100 km | 7 jaar/ 105 000 km waarborg en omvattende instandhoudingsplan | R983 300 |
BMW 520d M Sport | 140 kW/ 400 Nm | 5,2 ℓ/ 100 km | 2 jaar/ onbeperkte km waarborg 5 jaar/ 100 000 km omvattende instandhoudingsplan | R1 049 696 |
Jaguar XF D200 R-Dynamic HSE | 150 kW/ 430 Nm | 4,4 ℓ/ 100 km | 5 jaar/ 100 000 km waarborg en omvattende instandhoudingsplan | R1 162 022 |
Sjoe…. Lucas Maree se lied moet dalk verander na “Ek kan doen met ‘n biljoen?”