Mercedes-Benz V300d – die perfekte vakansiegenoot?

Deur Christo Brits

Ons lang beplande vakansie het uiteindelik aangebreek. Alles is noukeurig beplan. Ons bly in ʼn Engelse herehuis op ʼn 10 hektaar‑plot, met ons eie privaat strand, weg van die stad se geraas en natuurlik weg van die koronavirus!

Die gholfstokke is ingepak, want mens kan nie KwaZulu-Natal toe gaan en nie gholf speel nie.  Swemklere, winterklere, speelklere, kos en alles wat ons vir hierdie vakansie nodig het, pas maklik in die Mercedes-Benz V300d. Om die passasiers en bagasie te laai is ʼn fees met die skuif- en kattebakdeure wat met die druk van ’n knoppie oop- en toemaak.

Ons gaan laai vir ouma en oupa in Carletonville op, want ses grootmense met bagasie pas gemaklik in ʼn bus. Op pad word ons beïndruk met die bekerhouers wat warm én koud maak. Mamma se koffie word warm gehou, terwyl boetie daarop aandring dat sy koeldrank koud moet wees. Ons almal het sitplekverwarmers en sit heerlik warm terwyl ons die son sien opkom.

Ons ry op ʼn Maandag, maar nie enige Maandag nie – daardie Maandag! Natal brand en die paaie word toegemaak. By Harrismith besluit ons om die Bergville-roete te neem. Die is ook toe en ʼn vriend raai ons aan om Ladysmith om te ry. “Ry net Verkykerskop toe,” sê hy.

Na drie ure se op en af neem ons die besluit om om te draai en in Bethlehem te gaan oornag. Daar sal ons die situasie dophou en dán besluit waarheen. Al die paaie is toe.

Hartverskeurend neem ons twee dae later die besluit. Die see gaan ons nie die jaar sien nie. Elke wolk het ʼn silwer randjie en ons vakansie verander in ʼn lekker sloertoer. Met hierdie Mercedes wil mens net ry en ry en ry. Die binneruim van die V-Klas is uiters indrukwekkend en hiperluuks. Al die foefies verseker dat mens nie moeg word nie. Elke keer as ons stop, ruil die familie om want almal wil ook voor in die stuurkajuit sit. Elkeen programmeer die sitplekke en dit skuif noukeurig terug na die instellings wat vroeër gemaak is.

Die passasier is in beheer van die musiek en ons luister van rock tot opera. Almal merk op hoe suiwer die klankstelsel se gehalte is. Die kinders geniet die eettafeltjies terdeë wat jou laat voel asof jy in ʼn vliegtuig is! Mamma sit doodstil agter in ʼn hoekie. Daar is genoeg beenruimte en plek vir die reusekombers wat sy besig is om te hekel.

Ons draai anderkant Vaalwater terug, na ʼn wonderlike vier dae op vriende se jagplaas. Na 1 976 km is ek verstom met die dieselverbruik. Byna 11 km per liter, teen 120 km/h is hierdie voertuig nog ekonomies ook. Die aanpasbare spoedkontrole werk fantasties en verminder self spoed om ʼn veilige volgafstand te handhaaf van die motor voor jou.

Wat sal my bybly van die vakansie? Seker nie die onluste in KwaZulu-Natal nie, maar wel die V300d.

Ek glo nie mens kan die Mercedes-Benz V300d met enige ander voertuig vergelyk nie. Die ontwerp, binneruim, gehalte en luuksheid is uit die boonste rakke. Ek sukkel ook om aan ʼn taak te dink (behalwe dalk hooibale laai) waar die V300d nie ʼn byna perfekte oplossing bied nie. Sloertoer, winkels toe of kinders skool toe neem – die V300d eet die myle op.

Die reeks lyk só:

Die reeks word gedek deur ʼn 2 jaar/onbeperkte km‑waarborg en 5 jaar/100 000 km‑diensplan.

Die kompetisie lyk só:

Tussen dié mededingers is daar min wat by die luuksheid van die V-klas kom. Sy prys is egter aan die wilde kant. Indien jy in die mark vir ʼn bussie vir jou gesin is, gaan toetsbestuur almal; jy ontdek dalk ʼn juweel.