Minder geld maar steeds pure GTI

Volkswagen se Polo is uiters gewild in Suid-Afrika maar sy GTI-weergawe kon nog nooit werklik kers vashou vir sy grootboet, die Golf GTI, nie.

Die Golf GTI was waarskynlik die voorvader van die warm luikrug in Suid-Afrika in die tagtigerjare – maar alles het sedertdien aanbeweeg, veral die pryse.

ʼn Nuwe Golf GTI sal jou R689 800 uit die sak jaag! Dit is heeltemal aan die verkeerde kant van ʼn halfmiljoen. Die Polo GTI is egter joune teen R494 600 – dit is R200 000 minder vir ʼn steeds egte GTI.

Mense sê dalk dat hulle ʼn groter voertuig as ʼn Polo wil hê, maar die nuwe Polo is groter as wat die Golf III was. Sy verpakking het nou werklik slim geraak en die voertuig voel lekker ruim, veral vir voorste passasiers. Ek is nie heeltemal gek oor die Polo se ontwerp nie – maar die agterkant se nuwe ligte is ʼn mooi verbetering, en die bougehalte en binneruim is uiters puik.

Die binneruim is bedek met luukse materiale, ʼn sagte plastiek paneelbord, ʼn lieflike raakskerminligtingstelsel en digitale instrumente wat aangepas kan word om die inligting te vertoon soos jy dit verkies. Die feit dat daar nog ʼn volumeknoppie is, en fisieke knoppies is vir dinge soos vastrapbeheer en dies meer is ʼn reusevoordeel bó die nuwer Golf se digitale kajuit wat nie gebruikersvriendelik is nie.

Onder die kap sit ʼn lekker 2.0 viersilinderturbopetrolenjin wat 147 kW en 320 Nm bied. Net soveel kW soos die Golf V GTI, maar 40 Nm meer. Die Polo maak gebruik van ʼn 6-spoed DSG- dubbelkoppelaar outomatiese ratkas met lanseerbeheer. Dit beteken dat hy van stilstand tot 100 km/h sal spring in 6,7 sekondes – net 0,3 sekondes stadiger as die R200 000-duurder Golf GTI. Die Polo is ook maar net 12 km/h stadiger met 238 km/h teenoor die Golf se 250 km/h.

Aan die veiligheidskant het die nuwer Polo Volkswagen se volle suite van veiligheidstelsels wat aktiewe stelsels insluit soos blindekolwaarskuwing, baanbeheer, botsingwaarskuwing én noodremhulp. Aan die passiewe kant is daar ses lugsakke, sluitweerremme met elektroniese remkragverspreiding en vastrap- en- stabiliteitsbeheer.

Die Polo GTI is vir my nou vir die eerste keer werklik ʼn alternatief vir die Golf. Hy is mooi met ʼn puik binneruim en genoeg ruimte. Hy is blitsig met padhouvermoë wat verstom in dié segment. Wanneer ʼn mens sag werk met hom is hy lekker lig op brandstof – en met al die truuks voel dit soos ʼn luukse voertuig. Vir diegene wat graag iets warmer wil hê in plaas van ʼn gewone buksie, is die Polo GTI in die kol.

Volkswagen se GTI’s lyk só:

Die kompetisie lyk só:

Nie een van dié mededingers is werklik ʼn direkte mededinger vir die Polo nie. Die Swift kom seker die naaste in terme van grootte, maar die Polo het ʼn hoër spesifikasie en meer krag. Die Mini is gelyk op krag, maar baie duurder en heelwat kleiner in binneruim. Die Yaris is meer ʼn Golf GTI-mededinger en het slegs drie deure én is heelwat duurder – maar dié vyf is tans die enigste warm luikrûe op die mark in Suid-Afrika. Die Polo GTI tref die beste balans tussen prys, verrigting en grootte. Gaan toetsbestuur beslis een.