Mini knap sy reeks op

Die Mini is sinoniem met pret – ʼn stylvolle klein blitsbuksie met hope karakter. In die laaste weergawe het die ontwerp van die driedeur, vyfdeur en afslaandak effens fiemiesrig geraak. Nie lelik nie, maar asof daar elemente is wat nie daar hoort nie. Kyk ek sal byvoeg, ek weet niks van ontwerp af nie, maar ek het geweet hy kan beter lyk.

Met die jongste opknapping het Mini ʼn plan met daai fiemies gesien. Die lyne en ontwerp van al drie modelle is effens skoongemaak. Van die chroom is verwyder – nou lyk die Cooper asof hy ʼn oulike haarsny gehad het… nou’s hy weer mooi.

Die binneruim voel steeds soos dieselfde motor, maar die onnodige visuele tierlantyntjies is verwyder en die binneruim is ʼn aangenamer plek om tyd in deur te bring as gevolg daarvan. Die nuwe raakskerminligtingstelsel werk puik, veral as dit met Android Auto en Apple CarPlay toegerus is.

Ek het een enkele probleem. My lyf is nie meer so mini nie; die sitplek voel dus aanvanklik effens knap, maar ná so ʼn halfuur is jy gemaklik. Ons het onlangs by Perdekrag ʼn video gemaak met die Cooper SE. Ek’t daar gekla oor die knap binneruim, maar eerste aan die beurt met die bekendstelling was die vierdeur‑luikrugmodel. Hy is werklik beter en ʼn mens sal selfs passasiers agter kan inlaai.

Op die pad beïndruk die nuutste Cooper S. Hy maak gebruik van BMW se 2.0‑viersilinderturbopetrolenjin wat 141 kW en 280 Nm bied. Die enjin is nou gepaard aan ʼn 7-spoed‑dubbelkoppelaarratkas. Hy snol tot 100 km/h in 6,8 sekondes, en sal aanhou tot 235 km/h. Indrukwekkend.

Die gewone Cooper, sonder die S, maak gebruik van BMW se 1.5‑driesilinderturbopetrolenjin. Hy bied 100 kW en 220 Nm. Lekker sterk. Hy gebruik dieselfde ratkas en kan van 0‑100 km/h snol in 8,1 sekondes en sal 210 km/h haal voluit. Indrukwekkend vir ʼn 3-silinder.

Op die pad het die vierdeur‑Cooper S gemakliker gevoel as die tweedeur‑Cooper. Dit kan moontlik wiel- en bandgroottes wees wat verskil, óf eenvoudig bande wat dalk te hard gepomp is. Vanuit ʼn veiligheidsoogpunt is die Mini’s vol geprop. Daar is ses lugsakke, sluitweerremme, elektroniese remkragverspreiding, remhulp, vastrap- en stabiliteitsbeheer – de lot.

Dit is maklik om die reeks op te som. Daar is nou ʼn Mini vir elke smaak. Daar is die intreemodel, die One. Dan is daar die drie- en vyfdeur, én die John Cooper Works-weergawes met nóg meer krag. ʼn Mens moet ook nie die SE- elektriese weergawe vergeet nie. Indien jy in die mark is, gaan toetsbestuur beslis ʼn Mini, dis hope pret.

Die reeks lyk só:

Mini One Hatch; driedeur75 kW/190 Nm5,6 l/100 kmR424 554
Mini One Hatch; vyfdeur75 kW/190 Nm5,7 l/100 kmR434 968
Mini Cooper Hatch; driedeur100 kW/220 Nm5,6 l/100 kmR489 654
Mini Cooper Hatch; vyfdeur100 kW/220 Nm5,7 l/100 kmR500 068
Mini Cooper S Hatch; driedeur141 kW/280 Nm6 l/100 kmR564 058
Mini Cooper S Hatch; vyfdeur141 kW/280 Nm6 l/100 kmR574 058
Mini John Cooper Works Hatch; driedeur170 kW/320 Nm6,3 l/100 kmR668 124
Mini Cooper SE Hatch; driedeur135 kW/270 Nm17,5 kWh/100 kmR686 400
Mini Cooper SE Hatch Collection 2021; driedeur135 kW/270 Nm17,5 kWh/100 kmR729 900
Mini John Cooper Works GP225 kW/450 Nm7,5 l 100 kmR809 488

Die reeks word gedek deur ʼn twee jaar/onbeperkte km‑waarborg en vyf jaar/100 000 km‑ omvattende instandhoudingsplan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Michael ·

Dis jammer die Mini is nie meer ‘n mini nie-te groot geword. Indien hy die grootte van bv ‘n VW UP was-nader aan sy oorspronklike grootte – sou BMW 3 maal meer van hulle verkoop het

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.